پاکستان میں جاپانی کمپنیوں کے لئے سرمایہ کاری کے وسیع مواقع موجود ہیں، وزیراعظم شہباز شریف کی صدرٹویوٹا ایشیا اور سی ای او انڈس موٹرز سے گفتگو

وزیراعظم۔۔۔گفتگو
پاکستان میں جاپانی کمپنیوں کے لئے سرمایہ کاری کے وسیع مواقع موجود ہیں، وزیراعظم شہباز شریف کی صدرٹویوٹا ایشیا اور سی ای او انڈس موٹرز سے گفتگو
اسلام آباد۔1جون (اے پی پی):وزیراعظم محمد شہباز شریف نے کہا ہے کہ حکومت ملک میں سرمایہ کاری کے فروغ کے لئے صنعتوں کو مکمل سہولیات فراہم کر رہی ہے، پاکستان میں جاپانی کمپنیوں کے لئے سرمایہ کاری کے وسیع مواقع موجود ہیں، پاکستان میں ہائبرڈ گاڑیوں کی پیداوار سے ایندھن کے درآمدی بل میں کمی اور قیمتی زرمبادلہ کی بچت ہوگی۔ وزیراعظم میڈیا آفس کی جانب سے جاری بیان کے مطابق انہوں نے ان خیالات کا اظہار ٹویوٹا ایشیا کے صدر یوشیکی کونیشی اور انڈس موٹرز کے سی ای او علی اصغر جمالی سے گفتگو کرتے ہوئے کیا جنہوں نے جمعرات کو ان سے یہاں ملاقات کی۔ ملاقات میں پاکستان میں جاپان کے سفیر متسوہیرو وادا، وائس چیئرمین ٹویوٹا انڈس موٹرز شن جی یناجی ، وفاقی وزیرِ خزانہ اسحاق ڈار، وفاقی وزیرِ صنعت و پیداوار مخدوم مرتضیٰ محمود، مشیر وزیراعظم احد خان چیمہ، معاونین خصوصی جہانزیب خان، طارق باجوہ اور متعلقہ اعلیٰ حکام نے شرکت کی۔ اس موقع پر وزیراعظم نے کہا کہ پاکستان جاپان کو اپنی ترقی اور خوشحالی کے ایک اہم شراکت دار کی نگاہ سے دیکھتا ہے، پاکستان میں جاپانی کمپنیوں کیلئے سرمایہ کاری کیلئے وسیع مواقع موجود ہیں۔ انہوں نے کہا کہ پاکستان میں ٹویوٹا کی مقامی سطح پر ہائبرڈ گاڑیوں کی پیداوار خوش آئند ہے، پاکستان میں ہائیبرڈ گاڑیوں کی پیداوار سے ایندھن کے درآمدی بل میں کمی سے قیمتی زرمبادلہ کی بچت ہوگی۔ وزیراعظم نے کہا کہ حکومت ملک میں جدید ٹیکنالوجی میں سرمایہ کاری کے فروغ کیلئے صنعتوں کو مکمل سہولیات فراہم کر رہی ہے، پاکستان کی انجینئرنگ کے شعبے کی استعداد سے فائدہ اٹھا کر سپیئر پارٹس کی برآمدات کو بڑھایا جائے۔ وزیراعظم کو بتایا گیا کہ ٹویوٹا انڈس موٹرز نے 100 ملین ڈالر کی سرمایہ کاری سے پاکستان میں پہلی مرتبہ ہائیبرڈ گاڑیوں کا یونٹ قائم کیا ہے جو جلد پیداوار شروع کرے گا۔ ملاقات میں مزید بتایا گیا کہ ٹویوٹا انڈس موٹرز جولائی سے آٹو سپیئر پارٹس کی برآمد شروع کر رہی ہے، اس اقدام سے پاکستان گاڑیوں کے سپیئر پارٹس کی عالمی سپلائی چین میں اپنی جگہ بنا سکے گا۔ اس موقع پر وزیراعظم نے کہا کہ پاکستان میں انجینئرنگ شعبے کی استعداد سے بھرپور فائدہ اٹھا کر زیادہ سے زیادہ آٹو سپیئر پارٹس کی برآمد کیلئے اقدامات اٹھائے جائیں۔ وزیرِاعظم نے اس موقع پر کہا کہ یقینی بنایا جائے کہ پاکستان میں فروخت کی جانے والی گاڑیوں میں پارٹس کی اکثریت مقامی طور پر تیار شدہ ہو۔ جاپانی سفیر نے کہا کہ چاپان کی بڑی کمپنیاں پاکستان میں مزید سرمایہ کاری کی خواہشمند ہیں۔شرکائ نے وزیراعظم کی قیادت میں حکومت کی کاروبار دوست پالیسیوں پر وزیراعظم کو خراج تحسین پیش کیا۔ جاپانی سفیر نے وزیراعظم کو جاپان کی پاکستان میں مختلف شعبوں میں سرمایہ کاری میں گہری دلچسپی سے آگاہ کیا جس کا وزیراعظم نے خیرمقدم کیا۔

Daily Askar

Comments are closed.