ہم یومِ متحدہ عرب امارات پر اتحاد و یگانگت کا جشن منا رہے ہیں

عسکر انٹرنیشنل رپورٹ

پریس ریلیز

01 دسمبر 2025

کراچی — پاکستان–یو اے ای بزنس کونسل (پی یو بی سی) ایف پی سی سی آئی کی جانب سے متحدہ عرب امارات کے قومی دن کے موقع پر یو اے ای کی قیادت، حکومت اور عوام کو دلی مبارکباد پیش کی گئی ہے۔ یہ دن ’’روحِ اتحاد‘‘ کی تاریخی ترقی، معاشی تبدیلی اور سفارتی مہارت کی شاندار علامت ہے۔

چیئرمین پاک–یو اے ای بزنس کونسل دیوان فخرالدین نے پاکستان اور امارات کے گہرے، مضبوط اور مسلسل ترقی کرتے تعلقات پر زور دیتے ہوئے کہا کہ دونوں ممالک کا رشتہ محض تاریخی بھائی چارے سے آگے بڑھ چکا ہے اور اب ایک جدید، باہمی فائدے پر مبنی معاشی شراکت داری میں تبدیل ہو رہا ہے۔

انہوں نے کہا کہ یو اے ای کا عالمی مالیاتی، تجارتی اور اختراعی مرکز کے طور پر ابھرنا پورے خطے کے لیے ایک محرک ہے۔ انہوں نے پاکستانی برآمدات میں تنوع، ویلیو ایڈڈ ٹیکسٹائل، خصوصی زرعی مصنوعات اور آئی ٹی/آئی ٹی ای سروسز کو اماراتی مارکیٹ میں فروغ دینے کے لیے مشترکہ کوششوں کی ضرورت پر زور دیا۔

دیوان فخرالدین نے اعلیٰ سطحی سرمایہ کاری میکنزم کو خوش آئند قرار دیتے ہوئے اسے دونوں ملکوں کے مشترکہ اقتصادی مستقبل کا ضامن قرار دیا۔ انہوں نے کراچی میں متحدہ عرب امارات کے قونصل جنرل محترم باخت عتیق الرمیثی کی غیرمعمولی خدمات کو خصوصی طور پر سراہا، جن کی کاروباری برادری سے مضبوط شمولیت، ویزہ سہولت، بی ٹو بی روابط کے فروغ اور دونوں معیشتوں کے درمیان عملی پل کا کردار قابل تحسین ہے۔

پی یو بی سی نے اس عزم کا اعادہ کیا کہ وہ یو اے ای حکام کے ساتھ مل کر بڑے اماراتی سرمایہ کاری منصوبوں کی رفتار تیز کرنے، ریگولیٹری تسلسل کو بہتر بنانے اور Ease of Doing Business کو مضبوط بنانے میں اپنا کردار ادا کرتی رہے گی۔

انہوں نے دوطرفہ تجارت میں بہتری، متوازن تجارتی تعلقات اور ہدفی برآمداتی حکمتِ عملی پر زور دیتے ہوئے کہا کہ یو اے ای میں موجود 18 لاکھ پاکستانیوں کی خدمات اور ترسیلات پاکستان کی معاشی مضبوطی کا اہم ستون ہیں۔