اسلام آباد میں مسلح افراد کی فائرنگ سے مولانا مسعود الرحمان جاں بحق ہوگئے جبکہ ان کا ڈرائیور زخمی ہوگیا، دو موٹر سائیکل سوار ملزمان حملے کے بعد فرار ہوگئے۔
اسلام آباد کے علاقے تھانہ کہنہ کی حدود میں غوری ٹاؤن میں دو موٹر سائیکل سوار ملزمان نے کار پر فائرنگ کی، پولیس کے مطابق واقعے میں سنی علماء کونسل کے ڈپٹی سیکریٹری جنرل مولانا مسعود الرحمان جاں بحق اور ان کا ڈرائیور زخمی ہوگیا۔
پولیس کا کہنا ہے کہ موٹر سائیکل سوار ملزمان نے کار پر اندھا دھند فائرنگ کی، جاں بحق اور زخمی کو اسپتال منتقل کردیا گیا۔
پولیس کے مطابق سی سی ٹی وی کیمروں کی مدد سے ملزمان کو ٹریس کیا جارہا ہے، جلد گرفتار کرکے قانون کے کٹہرے میں لایا جائے گا۔
مقتول مسعود الرحمان عثمانی سنی علماء کونسل کے ڈپٹی سیکریٹری جنرل تھے، ان کی نماز جنازہ کل دن دو بجے پارلیمنٹ ہاؤس کے باہر ادا کرنے کا اعلان کیا گیا ہے۔
رپورٹ کے مطابق مولانا مسعود الرحمان کی میت کو جامع مسجد رحمانی آبپارہ سے لے جایا جائے گا، سنی علماء کونسل کی تمام کارکنان کو کل دن ایک بجے آبپارہ پہنچنے کی ہدایت کی گئی ہے۔
Comments are closed.