صدر مملکت ڈاکٹر عارف علوی سے ترک بحری افواج کے کمانڈر کی ملاقات

:صدر مملکت ڈاکٹر عارف علوی نے کہا ہے کہ پاکستان اور ترکیہ کے درمیان مشترکہ مذہب، تاریخی رشتوں پر مبنی بہترین تعلقات ہیں، پاکستان اور ترکیہ مختلف امور پر یکساں مؤقف کے حامل ہیں۔ صدر ڈاکٹر عارف علوی سے ترک بحری افواج کے کمانڈر ارجمند تاتیل اوگلو نے منگل کو یہاں ایوان صدر میں ملاقات کی ہے۔ ایوان صدر کے میڈیا ونگ کی جانب سے جاری اعلامیہ کے مطابق ملاقات میں پاک بحریہ کے سربراہ ایڈمرل محمد امجد خان نیازی اور پاکستان میں ترکیہ کے سفیر بھی شریک تھے۔ اس موقع پر پاکستان اور ترکیہ کا باہمی فائدے کیلئے مختلف شعبوں میں دوطرفہ تعاون مزید مضبوط بنانے کے عزم کا اعادہ کیا گیا۔ صدر مملکت ڈاکٹر عارف علوی نے اس موقع پر کہا کہ دونوں ممالک کے مابین مشترکہ مذہب، تاریخی رشتوں پر مبنی بہترین تعلقات ہیں۔ انہوں نے کہا کہ پاکستان اور ترکیہ مختلف امور پر یکساں مؤقف کے حامل ہیں۔ صدر مملکت نے سمندری اور دفاعی تعاون سمیت مختلف شعبوں میں دوطرفہ تعاون مزید بہتر بنانے کی ضرورت پر زور دیا۔ صدر مملکت نے پاک بحریہ کیلئے چار ملجم کارویٹس میں سے پہلے کی لانچنگ تقریب میں شرکت کیلئے اگست 2021ء میں ترکیہ کے دورے کا بھی ذکر کیا۔ انہوں نے نے دوطرفہ اور کثیر الجہتی مشقوں میں دونوں برادر ممالک کی بحری افواج کی باقاعدہ شرکت کو سراہتے ہوئے کہا کہ دوطرفہ قریبی بحری تعاون پاکستان اور ترکیہ کے درمیان مضبوط تعلقات کا مظہر ہے۔ صدر ڈاکٹر عارف علوی نے بھارت میں اقلیتوں پر ہونے والے ظلم و ستم پر تشویش کا بھی اظہار کرتےہوئے غیر قانونی بھارتی مقبوضہ جموں و کشمیر میں مسلمانوں کے خلاف بھارتی سکیورٹی فورسز کے مظالم کو بھی اجاگر کیا۔ انہوں نے کہا کہ عالمی برادری کو مقبوضہ جموں و کشمیر میں انسانی حقوق کی خلاف ورزیوں، بھارت میں اقلیتوں پر ظلم کا نوٹس لینا چاہئے۔ صدر مملکت نے تنازعہ جموں و کشمیر پر پاکستان کے اصولی موقف پر ترکی کی حمایت کو بھی سراہا۔ ملاقات کے دوران گفتگو کرتے ہوئے ترک تیول کمانڈر ارجمند تاتیل اوگلو نے کہا کہ مستقبل میں دونوں ممالک کے درمیان تعاون مزید بڑھے گا۔ انہوں نے کہا کہ یہ دورہ پاکستان اور ترکیی کے درمیان دوطرفہ دفاعی تعلقات مزید مستحکم کرنے میں سود مند ثابت ہوگا۔قبل ازیں صدر مملکت ڈاکٹر عارف علوی نے ترک بحری افواج کے کمانڈر کو پاکستان اور ترکی کے درمیان میری ٹائم اور بحری تعاون کو فروغ دینے میں خدمات کے اعتراف میں نشان امتیاز (ملٹری) سے بھی نوازا۔