وزیر اعلیٰ میر سرفراز بگٹی نے بلوچستان میں حفاظتی ٹیکہ جات کی شرح میں نمایاں اضافہ ظاہر کر دیا

عسکر انٹرنیشنل رپورٹ

کوئٹہ | 9 نومبر 2025

وزیر اعلیٰ میر سرفراز بگٹی نے بلوچستان میں حفاظتی ٹیکہ جات کی شرح میں نمایاں اضافہ ظاہر کر دیا

وزیر اعلیٰ بلوچستان میر سرفراز بگٹی نے صوبے میں حفاظتی ٹیکہ جات کی شرح میں نمایاں بہتری ظاہر کرتے ہوئے کہا ہے کہ صحت عامہ کے شعبے میں یہ پیش رفت گزشتہ پانچ برس کے جمود کے خاتمے کی علامت ہے۔

وزیر اعلیٰ کے مطابق بچوں کے فل امیونائزیشن ریٹ میں ایک سال کے دوران 38 فیصد سے اضافہ ہو کر 47 فیصد تک پہنچ گیا ہے، جو صوبائی حکومت کی مؤثر اصلاحات اور ہدفی اقدامات کا نتیجہ ہے۔

میر سرفراز بگٹی نے کہا کہ یہ کامیابی شفاف پالیسیوں اور بہتر نظم و نسق کا ثبوت ہے جس سے عوامی اعتماد میں اضافہ ہوا ہے اور صحت عامہ کے نظام میں واضح بہتری آئی ہے۔

انہوں نے مزید بتایا کہ یہ نتائج تھرڈ پارٹی ویریفکیشن آف امیونائزیشن کوریج سروے اور آغا خان یونیورسٹی کی رپورٹ کے ذریعے تصدیق شدہ ہیں، جس کے مطابق ایکسپینڈڈ پروگرام آن امیونائزیشن (EPI) کے تحت 70 فیصد ہدف حاصل کر لیا گیا ہے۔

وزیر اعلیٰ نے کہا کہ صحت کے شعبے میں یہ سنگِ میل بلوچستان کے بہتر اور محفوظ مستقبل کی ضمانت ہے۔ “حفاظتی ٹیکہ جات کی شرح میں یہ اضافہ ہر بچے کے لیے امید اور ترقی کی علامت ہے،” میر سرفراز بگٹی نے کہا۔