سعودی عرب ایکسپو 2030 کی میزبانی کے دوران روزگار کے ڈھائی لاکھ مواقع فراہم کرے گا، وزیر سیاحت

ریاض۔14دسمبر (اے پی پی):سعودی وزیر سیاحت احمد الخطیب نے کہا ہے کہ ریاض میں ایکسپو 2030 کی میزبانی کے دوران سعودی عرب روزگار کے ڈھائی لاکھ مواقع فراہم کرے گا۔

اردو نیوز کے مطابق انہوں نے لیبر مارکیٹ کی بین الاقوامی کانفرنس کے موقع پر ایک مباحثے میں حصہ لیتے ہوئے کہا کہ سعودی عرب ایکسپو 2030 کے موقع پرایک ہزار ہوٹل کمرے فراہم کرے گا
انہوں نے بتایا کہ سعودی عرب 2019 میں سیاحت کی قومی حکمت عملی متعارف کراچکا ہے جس کے تحت سیاحت سے قومی پیداوار میں تین سے دس فیصد تک اضافہ ہو گا۔ 2030 تک دس لاکھ اضافی اسامیاں پیدا کرنا ہوں گی۔ احمدالخطیب نے کہا کہ2030 تک عالمی آبادی 8.5 ارب تک پہنچ جائے گی۔ بیشتر خدمات کو ڈیجیٹل کیا جا رہا ہے جس میں لیبر مارکیٹ بھی شامل ہے۔ انہوں نے مزید کہا کہ سیاحت کا شعبہ بین الاقوامی لیبر مارکیٹ کا10فیصد ہے۔ اس مارکیٹ سے 2019 میں 330 ملین افراد کو روزگار مل رہا تھا۔

کورونا وائرس کی وبا کے دوران ہوٹلوں اور فضائی کمپنیاں شدید متاثر ہوئیں اور اس شعبے کے 60 ملین افراد روزگار سے محروم ہوگئے۔ انہوں نے کہا کہ اقوام متحدہ کے ماتحت عالمی ادارے سیاحت اور سیاحتی کونسل کے مطابق کورونا وائرس سے پہلے کا دور واپس آگیا ہے جو خوش آئند بات ہے۔ انہوں نے کہا کہ سیاحت کا عالمی شعبہ لیبر مارکیٹ کے دس فیصد افراد کو ملازمت فراہم کر رہا ہےاور مستقبل میں اس کے بڑھنے کے امکانات روشن ہیں۔

Web Desk

Comments are closed.