اقوام متحدہ۔14دسمبر (اے پی پی):اقوام متحدہ کی سلامتی کونسل نے ڈیرہ اسماعیل خان میں دہشت گرد حملے کی شدید مذمت کرتے ہوئے تمام ریاستوں پر زور دیا ہے کہ وہ حملے میں ملوث افراد کو انصاف کے کٹہرے میں لانے میں پاکستان کے ساتھ تعاون کریں۔
اقوام متحدہ کی 15رکنی سلامتی کونسل کے صدر جوز ڈی لا گاسکا کی جانب سے جاری پریس ریلیز کے مطابق سلامتی کونسل کے اراکین نے متاثرین کے اہل خانہ اور حکومت پاکستان سے گہری ہمدردی اور تعزیت کا اظہار کیا اور زخمیوں کی جلد اور مکمل صحت یابی کے لئے نیک خواہشات کا اظہار کیا
بیان میں کہا گیا کہ سلامتی کونسل کے اراکین نے اس عزم کا اعادہ کیا کہ دہشت گردی اپنی تمام شکلوں اور مظاہر میں بین الاقوامی امن و سلامتی کے لیے سب سے سنگین خطرات میں سے ایک ہے۔ سلامتی کونسل کے اراکین نے اس بات پر زور دیا کہ دہشت گردی کی ان قابل مذمت کارروائیوں کے مرتکب افراد، منتظمین، مالی معاونت کرنے والوں اور سرپرستی کرنے والوں کو جوابدہ ٹھہرانے اور انہیں انصاف کے کٹہرے میں لانے اور اس سلسلے میں حکومت پاکستان کے ساتھ ساتھ دیگر تمام متعلقہ حکام کے ساتھ فعال تعاون کرنے کی ضرورت ہے۔ اراکین نے اس بات کا اعادہ کیا کہ دہشت گردی کی کوئی بھی کارروائی مجرمانہ اور بلا جواز ہے،اس بات سے قطع نظر کہ اس کے محرکات کوئی بھی ہوں جہاں بھی، جب بھی اور جس نے بھی ارتکاب کیا ہو۔
انہوں نے اقوام متحدہ کے چارٹر اور بین الاقوامی قوانین کے تحت بین الاقوامی انسانی حقوق کے قانون، پناہ گزینوں کے بین الاقوامی قانون اور بین الاقوامی انسانی حقوق کے قانون، دہشت گردی کی کارروائیوں کی وجہ سے بین الاقوامی امن اور سلامتی کو لاحق خطرات سمیت دیگر ذمہ داریوں کے مطابق تمام ریاستوں کو دہشت گردی کے خلاف ہر طرح سے نمٹنے کی ضرورت کو اجاگر کیا
Comments are closed.