اسلام آباد۔14دسمبر (نمائندہ عسکر):وفاقی تحقیقاتی ا دارہ (ایف آئی اے) نے ملک میں پہلی بار نیشنل ان پرسن ٹریفکنگ (ٹی آئی پی ) کی روک تھام تھام کے لئے ہاٹ لائن کا آغاز کر دیا ہے ۔ انٹرنیشنل لیبر آرگنائزیشن (آئی ایل او) کے تعاون سے انسانی اسمگلنگ کے متاثرین کو ایک ہی چھت تلے خدمات کی فراہمی یقینی ہوسکے گی ۔تقریب میں ڈائریکٹر جنرل ایف آئی اے محسن حسن کے علاوہ اے ڈی جی امیگریشن، ایف آئی اے، یو این او ڈی سی کے کنٹری نمائندے، آسٹریلوی ڈپٹی ہائی کمشنر، ڈائریکٹر آئی ایل او، امریکی پولیٹیکل ایڈوائزر، دیگر معززین، صوبوں سے ایف آئی اے کے سینئر افسران نے بھی شرکت کی۔
پراجیکٹ کے فوکل پرسن و ایف آئی اے کی ایڈیشنل ڈائریکٹر شیریں ملک شیر، ڈائریکٹر اینٹی ہیومن سمگلنگ ڈائریکٹوریٹ ایف آئی اے اسرار احمد خان کی نگرانی یہ پراجیکٹ قلیل مدت میں مکمل کیا گیا ہے ۔ اس منصوبے کے لئے آسٹریلوی ہائی کمیشن نے انٹرنیشنل لیبر آرگنائزیشن کے ذریعے فنڈ فراہم کیا تھا۔
پراجیکٹ فوکل پرسن شیریں ملک شیر نے پراجیکٹ کے حوالے سے “اے پی پی “کو بتایا کہ یہ پہلا اقدام ہے جس میں فوری ایکشن کو یقینی بنانے کا طریقہ کار موجود ہوگا۔ انہوں نے کہا کہ ہاٹ لائن پر شکایت موصول ہونے کے بعد، ٹی آئی پی سہولت مرکز کا متعلقہ ذمہ دار ایک کلک کے ساتھ پاکستان بھر کے متعلقہ تھانوں کو اسمگلروں کے خلاف شکایت بھیجے گا۔
ڈی جی ایف آئی اے محسن حسن بٹ نے کہا کہ نیشنل ٹی آئی پی ہاٹ لائن پراجیکٹ برائے نیشنل ریفرل میکانزم انسانی سمگلنگ کے خلاف جنگ میں اہم کردار ادا کریگا ۔حکومت پاکستان کی جانب سے بین الاقوامی ذمہ داریوں کے بارے میں متواتر رپورٹنگ کا اعتراف کرتے ہوئے یہ نظام ملک بھر میں رپورٹنگ کے لیے زیادہ مربوط، موثر اور ہم آہنگ نقطہ نظر کی جانب ایک ارتقائی پیش رفت کو ظاہر کرتا ہے ۔
انہوں نے کہا کہ یہ صرف ایک نظام نہیں ہے بلکہ تبدیلی کا ایک ذریعہ ہے ، اس طرح افراد کی اسمگلنگ کی روک تھام میں ایف آئی اے کی صلاحیت میں بھی اضافہ ہوگا ۔اس موقع پر خطاب کرتے ہوئے آسٹریلوی ڈپٹی ہائی کمشنر نے ایف آئی اے اور آئی ایل او کی جانب سے اس ایپلی کیشن کے اجراء کے لیے کی جانے والی کوششوں کو سراہا جو کہ انسانی سمگلنگ کی ہر قسم کی لعنت کو روکنے کے لیے ایک انقلابی قدم ہو گا۔
اختتامی کلمات میں ڈی جی ایف آئی اے محسن حسن بٹ نے ایف آئی اے کو مدد فراہم کرنے پر اقوام متحدہ کے دفتر برائے منشیات و جرائم (یو این او ڈی سی) کا تہہ دل سے شکریہ ادا کیا اور کہا کہ وفاقی تحقیقاتی ایجنسی (ایف آئی اے) دیرینہ اور نتیجہ خیز تعاون میں یو این ڈی سی کا قابل فخر شراکت دار ہے۔ انہوں نے کہا کہ افراد کی اسمگلنگ اور تارکین وطن کی اسمگلنگ سے نمٹنے کے لیے قومی ایکشن پلان یو این ڈی سی کے ساتھ مل کر مرتب کیا گیا تھا تاکہ اجتماعی کوششوں کے لیے ایک جامع ایجنڈا ترتیب دیا جا سکے۔
Comments are closed.