کتاب کی اہمیت کو نظر انداز نہیں کیا جا سکتا ،کامیاب کتب میلہ لائق تحسین ہے ،وزیر اعلی سندھ

کراچی۔ 14 دسمبر (نمائندہ عسکر):نگراں وزیر اعلی سندھ جسٹس (ر)مقبول باقرنے کہا ہے کہ کتاب لوگوں میں شعور پیدا کرتی ہے اور ذہنی تقویت کا باعث بنتی ہے۔ کتاب معاشرےکی تشکیل میں اہم کردار ادا کرتی ہے اس لئے اسکی ا ہمیت کو نظر انداز نہیں کیا جا سکتا۔۔

وہ جمعرات کو کراچی ایکسپو سینٹر میں18ویں عالمی کتب میلے کی افتتاحی تقریب سے خطاب کر رہے تھے۔ اس موقع پر پاکستان پبلشرز ایند بک سیلرز ایسوسی ایشن کے چیئرمین عزیز خالد،کے آئی بی ایف کے کنوینیر وقار متین ،سابق وفاقی وزیر اورسینیٹرفیصل سبزوار ی ،ایب و شعراسماجی و سیاسی شخصیات بھی موجود تھیں ۔

وزیر اعلی سندھ نے کتب میلے کے منتظمین کو کامیاب نمائش کے انعقاد پر مبارک باد پیش کرتے ہوئے کہا کہ کتاب معاشرہ کی تشکیل میں اہم کردار ادا کرتی ہے۔ افتتاحی تقریب سے خطاب کرتے ہوئے پاکستان پبلشرز ایند بک سیلرز ایسوسی ایشن کے چیئرمین عزیز خالد نے کہا کہ 2005سے 2023تک مسلسل کتب میلے کا انعقاد کامیابی سے جاری ہے۔

کتب میلے کے ذریعے کتب بینی کا کلچر دوبارہ آرہا ہے۔ بڑے شہروں کے علاوہ چھوٹے گاں دیہات میں اب بھی علم کا ذریعہ کتابیں ہیں۔ ایم کیو ایم کے رہنما اورسینیٹر فیصل سبزواری کا کہنا تھا کہ مجھے معلوم ہے کہ پاکستانی پبلشرز کاغذ کی قیمتوں میں اضافے کی وجہ سے مشکل میں ہیں تاہم درآمدی کاغذ پر انحصار کرنے کے بجائے کاغذ کی مقامی انڈسٹریز کو فروغ دیا جانا چاہیئے تاکہ ملکی معیشت بھی ترقی کرے اور پبلشرز کو بھی کم قیمت میں کاغذ دستیاب ہو سکے ۔

تقریب کے آخر میں کتب میلے کے کنونیئر وقار متین نے تمام مہمانوں کا شکریہ ادا کیا۔ افتتاحی تقریب کے اختتام پر چیئرمین کے آئی بی ایف خالد عزیز نے مہمانوں کو پھولوں کا گلدستہ اور اجرک پیش کی گئی اور وزیر اعلی سندھ جسٹس (ر)مقبول باقر اور فیصل سبزواری کو اجرک اور یادگاری شیلڈ پیش کی ۔

افتتاحی تقریب میں دو ادیب ڈاکٹر عقیل عباس جعفری اور ڈاکٹر بلال نقوی کا ایوارڈ دیا گیا جبکہ پبلشرز میں امینہ سید اور علیم قریشی کو ایوارڈ سے نوازا گیا۔درآمدی کاغذ پر ڈیوٹی کا اختیار وفاقی حکومت کا ہے تاہم سندھ حکومت درآمدی کاغذ کی قیمتوں میں کمی کیلئے وفاقی حکومت سے رابطہ کرےگی۔