کوئٹہ۔ 14 دسمبر (نمائندہ عسکر):بلوچستان فوڈ اتھارٹی نے چمن شہر میں قوانین کی خلاف ورزی اور ناقص اشیاءخوردونوش کی فراہمی پر کریک ڈاؤن کرتے ہوئے 34 متفرق خوراک کے مراکز پر جرمانے عائد کردئیے، صفائی کے نامناسب انتظامات سمیت معمولی نقائص پر 24 مراکز کو اصلاحی نوٹسز جاری کیے گئے ، دوران انسپیکشن لیبارٹری تجزیہ کیلئے مختلف اشیاءکے نمونے بھی لیے گئے جبکہ مالکان ، ورکرز کو حفظان صحت کے بنیادی اصولوں پر مبنی خصوصی فوڈ سیفٹی کتابچے بھی فراہم کیے گئے۔
ترجمان بی ایف اے کے مطابق لائسنس کی عدم دستیابی سمیت مختلف وجوہات پر جرمانہ کیے گئے مراکز میں 6 جنرل سٹورز ، 2 ہول سیل ٹریڈرز ، 3 بیکنگ یونٹس ، 10 فاسٹ فوڈ کارنرز ، 4 ہوٹل ، 2 نان شاپس ، 5 آئسکریم اینڈ جوس کارنرز اور ایک ٹی شاپ شامل ہے۔ مزید برآں بی ایف اے حکام نے مراکز مالکان کو لائسنس حاصل کرنے سمیت فوڈ سیفٹی ایس او پیز پر من و عن عملدرآمد اور شہریوں کو معیاری و محفوظ خوردنی اشیاءکی فراہمی یقینی بنانے کی ہدایت کی۔
علاوہ ازیں بی ایف اے حکام نے ایڈیشنل ڈپٹی کمشنر چمن عارف کاکڑ سے بھی ملاقات کی اور انہیں بلوچستان فوڈ اتھارٹی کے اغراض و مقاصد اور ناقص و جعلی مصنوعات کے خلاف اتھارٹی کے گزشتہ و جاری اقدامات بارے آگاہ کیا۔ ایڈیشنل ڈپٹی کمشنر نے صوبہ بھر میں خوراک کی کوالٹی بہتر کرنے کیلئے کئے گئے اقدامات اور عوام کو معیاری اشیاء کی فراہمی کیلئے ادارے کی کاوشوں کو سراہا ۔
Comments are closed.