اسلام آباد۔15دسمبر (نمائندہ عسکر):نگران وزیراعظم انوار الحق کاکڑ نے کشمیری عوام کو یقین دلایا ہے کہ پوری پاکستانی قوم ان کے حق خود ارادیت کیلئے جدوجہد آزادی میں ان کے ساتھ کھڑی ہے، کشمیریوں کی شمولیت کے بغیر یکطرفہ بھارتی اقدامات سے اس کی حیثیت میں کوئی فرق نہیں پڑتا، بھارت کو منہ کی کھانا پڑے گی۔ ان خیالات کا اظہار انہوں نے جمعہ کو اے جے کے ٹی وی کو خصوصی انٹرویو دیتے ہوئے کیا۔ وزیراعظم انوار الحق کاکڑ نے کہا کہ انہوں نے آزاد کشمیر کی قانون ساز اسمبلی سے اپنے خطاب میں تنازعہ کشمیر سے متعلق پاکستان کے مؤقف کی ترجمانی اور اعادہ کیا۔
انہوں نے کہا کہ بزرگ حریت رہنما سید علی گیلانی سمیت حریت قیادت جدوجہد آزادی کا ہراول دستہ ہے، کشمیری شہداء کا ہم پر قرض ہے، کشمیر کے بغیر پاکستان کا تصور ممکن نہیں، کشمیریوں کو یقین دلاتے ہیں کہ کندھے سے کندھا ملا کر حق خود ارادیت کیلئے ان کی جدوجہد میں ساتھ کھڑے ہیں۔ انہوں نے کہا کہ کشمیر بین الاقوامی سطح پر تسلیم شدہ متنازعہ علاقہ ہے اور اقوام متحدہ کی سلامتی کونسل کے ایجنڈے پر غیر حل شدہ موجود ہے، اقوام متحدہ کی قراردادوں کے مطابق اس کا واحد حل استصواب رائے ہے۔
انہوں نے کہا کہ کشمیریوں کی شمولیت کے بغیر یکطرفہ بھارتی اقدامات سے اس کی حیثیت میں کوئی فرق نہیں پڑتا، بھارت کو منہ کی کھانا پڑے گی۔ انہوں نے کہا کہ پاکستان نے مسئلہ کشمیر ہمیشہ ہر فورم پر اجاگر کیا اور کرتے رہیں گے، میر واعظ سمیت حریت رہنمائوں کا کردار کشمیریوں کی جدوجہد آزادی میں قابل تعریف ہے، حریت قیادت کے خلاف بھارتی مظالم کے باوجود کشمیریوں کی جدوجہد آزادی جاری رہے گی اور مزید مستحکم ہو گی۔
وزیراعظم نے کہا کہ آزاد کشمیر حکومت کے ساتھ مل کر کنٹرول لائن کے قریب مقیم کشمیریوں کے مسائل کے حل کیلئے اقدامات کریں گے۔ انہوں نے کہا کہ کشمیری قیادت کے ساتھ مشاورتی ملاقات ہوئی اور مسئلہ کشمیر کو اجاگر کرنے کیلئے حکمت عملی پر تفصیلی مشاورت ہوئی، حریت قیادت اور کشمیر کے منتخب نمائندوں کی مشاورت سے اقدامات کریں گے، مزید طاقت کے ساتھ مسئلہ کشمیر ہر بین الاقوامی فورم پر اٹھایا جائے گا۔
انہوں نے کہا کہ تکمیل پاکستان کے حصول میں کشمیریوں کا مؤثر کردار ہے، وہ قومی فریضہ کیلئے آگے بڑھ کر اپنا کردار ادا کریں، ہم کشمیریوں کی جدوجہد آزادی کو منطقی انجام تک پہنچا کر دم لیں گے، بھارتی مظالم کے باوجود مقبوضہ کشمیر کے عوام کے حوصلے بلند ہیں، ان کی جدوجہد آزادی کو سنہری حروف میں لکھا جائے گا، پوری پاکستانی قوم ان کے ساتھ کھڑی ہے۔
Comments are closed.