نگران وزیر خارجہ جلیل عباس جیلانی 16 سے 22 جنوری 2024 تک کمپالا، یوگنڈا کا دورہ کر رہے ہیں جہاں وہ 17 سے 20 جنوری 2024 تک غیر وابستہ تحریک کے سربراہان مملکت اور 19ویں سربراہی اجلاس میں شرکت کر رہے ہیں۔
تیسرا جنوبی سربراہی اجلاس22-21 جنوری 2024 کو منعقد ہوگا۔ دفتر خارجہ سے جاری بیان کے مطابق دونوں سربراہی اجلاس ممبران کے لیے عالمی، علاقائی، سیاسی اور سماجی اقتصادی مسائل پر مشترکہ موقف پر غور کرنے اور ان کو بڑھانے کا موقع فراہم کرتے ہیں۔دیرینہ رکن کے طور پر پاکستان نے غیر وابستہ تحریک کے ایجنڈے میں کردار ادا کیا ہے اور اسے تشکیل دیا ہے اور امن اور سلامتی سے متعلق علاقائی اور عالمی چیلنجوں کا جواب دینے میں این اے ایم کے کردار کو مزید مضبوط بنانے کے لیے پرعزم ہے۔
اسی طرح پاکستان گروپ 77 اور چین کا ایک فعال رکن رہا ہے اور پائیدار ترقی، غربت کے خاتمے اور موسمیاتی تبدیلیوں سمیت گلوبل ساؤتھ کے درمیان تعاون کو اعلیٰ ترجیح دیتا ہے۔ غیر وابستہ تحریک سربراہی اجلاس میں، وزیرخارجہ بین الاقوامی امن، سلامتی اور ترقی سے متعلق مقامی اور عصری عالمی چیلنجوں پر پاکستان کا نقطہ نظر پیش کریں گے۔ وہ کثیرالجہتی کو مضبوط بنانے اور اقوام متحدہ کے چارٹر کے مقاصد اور اصولوں کو فروغ دینے کے لیے این اے ایم کے کردار کو تقویت دینے کی ضرورت پر زور دیں گے۔
ساؤتھ سمٹ میں وزیر خارجہ مشترکہ چیلنجزپر روشنی ڈالنے کے علاوہ خوشحال اور متحد جنوب کے ایجنڈے پر اتفاق کرنے کے لیے گلوبل ساؤتھ کے ممالک کے درمیان تعاون اور یکجہتی کو بڑھانے پر پاکستان کا وژن پیش کریں گے۔دونوں سربراہی اجلاسوں کے موقع پر وزیر خارجہ کی دیگر شریک ممالک کے وفود کے سربراہان سے بھی دو طرفہ ملاقاتیں متوقع ہیں۔
Comments are closed.