کسٹم انٹیلی جنس کے ملک بھر میں جاری کریک ڈائون کے دوران 30کروڑ مالیت کی سمگل شدہ سگریٹس ضبط
کراچی۔ چیئرمین ایف بی آر عاصم احمد کی ہدایت کے مطابق اور ڈائریکٹر جنرل کسٹم انٹیلی جنس فیض احمدچدھڑ کے احکامات پر سگریٹ اسمگلروں کے خلاف کریک ڈائون مزید تیزکر دیاگیا۔ کسٹم انٹیلی جنس نے گزشتہ دس دنوں کے دوران ملک گیر کارروائیوں کے دوران 303 ملین مالیت کے اسمگل شدہ سگریٹس قبضے میں لیے ہیں۔
سب سے بڑی کاروائی بلوچستان میں کی گئی، جہاں کسٹم انٹیلی جنس نے 114.2ملین روپے مالیت کے غیر ملکی برانڈزکی4,280,000سگریٹس ضبط کیں۔ جبکہ صوبہ سندھ میں آٹھ کارروائیوں کے نتیجے میں 69.7ملین روپے مالیت کے اعلیٰ برانڈز کی1,420,700سگریٹس ضبط کی گئیں۔ اسی طرح پنجاب میں انٹیلی جنس پر مبنی کارروائیوں کے دوران، کسٹمز انٹیلی جنس کی ٹیم نے اسمگل شدہ1,294,000سگریٹس برآمد کیں جن کی مالیت 75.3 ملین ہے۔ اسی طرح کے پی کیکسٹمز انٹیلی جنس نے 43.9 ملین روپے مالیت کی 1,155,000اسمگل شدہ سگریٹس پکڑی ہیں۔
مجموعی طور پر گزشتہ دس دنوں کے دوران کسٹمز انٹیلی جنس نے اسمگل شدہ8,149,700سگریٹس ضبط کی ہیں جن کی مالیت 303 ملین ہے۔ اس سے موجودہ مالی سال 2022-23میں کسٹم انٹیلی جنس کے ذریعے اسمگل شدہ سگریٹوں کی ضبطگی کی کل تعداد33,994,850تک پہنچ گئی ہے جس کی مالیت 1324 ملین ہے۔ چیئرمین ایف بی آر عاصم احمد اور ڈائریکٹر جنرل کسٹم انٹیلی جنس فیض احمد چدھڑ نے کسٹمز انٹیلی جنس کوئٹہ، کراچی، ملتان، گوادر، حیدرآباد، لاہور، راولپنڈی اور پشاور کی کاوشوں کو سراہتے ہوئے اس امر کا اظہار کیا کہ انسانی وسائل اور لاجسٹکس کی کمی کے باوجود کسٹمز انٹیلی جنس بالعموم سمگلنگ کے تدارک اور بالخصوص سمگل شدہ سگریٹ کی اسمگلنگ کی روک تھام کے لیے مئوثر طریقے سے کوششیں کر رہی ہے۔
Comments are closed.