اسلام آباد۔20دسمبر (اے پی پی): اقوام متحدہ کی جنرل اسمبلی نے “عوام کے حق خود ارادیت کے عالمی حصول”سے متعلق پاکستان کی قرارداد اتفاق رائے سے منظور کر لی۔ دنیا بھر کے مختلف خطوں سے تعلق رکھنے والے ممالک کی ایک بڑی تعداد نے قرار داد کی حمایت کی اور تعاون فراہم کیا۔
ترجمان دفتر خارجہ کے مطابق لوگوں کا حق خود ارادیت بین الاقوامی قانون کا ایک بنیادی اصول ہے، جو اقوام متحدہ کے چارٹر کے آرٹیکل 1 اور شہری اور سیاسی حقوق اور اقتصادی، سماجی اور ثقافتی حقوق سے متعلق معاہدوں میں درج ہے۔ قرارداد میں غیر ملکی قبضے، نوآبادیاتی تسلط اور محکومیت کے تحت رہنے والے لوگوں کے حق خود ارادیت کے حصول کے لیے غیر واضح حمایت کا اعادہ کیا گیا۔
یہ غیر ملکی قبضے، مداخلت اور جارحیت کی سختی سے مخالفت کرتی ہے اور اس کی ذمہ دار ریاستوں سے مطالبہ کرتی ہے کہ وہ ایسی کارروائیاں فوری طور پر بند کریں۔ قرارداد میں اس بات پر بھی زور دیا گیا ہے کہ نوآبادیاتی و غیر ملکی تسلط کے تحت تمام لوگوں کے حق خود ارادیت کا عالمی حصول انسانی حقوق کی موثر ضمانت اور ان کے تحفظ اور فروغ کے لئے ایک بنیادی شرط ہے۔
پاکستان چار دہائیوں سے اس فلیگ شپ قرارداد کو سپانسر کر رہا ہے۔ یہ سالانہ اقدام بھارتی غیر قانونی مقبوضہ جموں و کشمیر اور مقبوضہ فلسطین میں سمیت غیر ملکی تسلط کی بین الاقوامی سطح پر تسلیم شدہ صورتحال میں رہنے والے لوگوں کے لیے امید کا پیغام فراہم کرتا ہے جنہیں ان کے ناقابل تنسیخ حق خود ارادیت سے محروم رکھا جا رہا ہے۔
Comments are closed.