پاکستان انٹر بورڈ سپورٹس گالا اسلام آباد میں شروع ہو گیا

اسلام آباد۔22دسمبر (اے پی پی):آل پاکستان انٹر بورڈ سپورٹس گالا پاکستان سپورٹس کمپلیکس اسلام آباد میں شروع ہو گیا ہے۔ سپورٹس گالا کے آرگنائزنگ سیکرٹری محمد بخش مری نے بتایا کہ سپورٹس گالا میں ملک بھر سے گرلز اور بوائز کے الگ، الگ بورڈز کی ٹیمیں مختلف کھیلوں کے مقابلوں میں حصہ لیں گی۔

گرلز کے مقابلے 21 سے 24 دسمبر تک کھیلے جائیں گے جبکہ بوائز کے مقابلے 26 سے 30 دسمبر تک کھیلے جائیں گے۔ گرلز کے مقابلوں میں اتھلیٹکس، ٹیبل ٹینس، بیڈمنٹن اور ہاکی کے مقابلے جبکہ مردوں کے مقابلوں میں اتھلیٹکس، ٹیبل ٹینس، والی بال اور کبڈی کے مقابلے شامل ہیں۔ مقابلوں کے اختتام پر کامیابی حاصل کرنے والے کھلاڑیوں میں انعامات تقسیم کئے جائیں گے۔