وزیرِ اعظم محمد شہباز شریف کو آج شام امریکی وزیرِ خارجہ مارکو روبیو نے ٹیلیفون کیا۔

وزیرِ اعظم آفس
پریس وِنگ
اسلام آباد – 26 جون 2025

گفتگو خوشگوار، خلوص پر مبنی اور تعمیری ماحول میں ہوئی۔ وزیرِ اعظم نے ایران اور اسرائیل کے درمیان جنگ بندی کے لیے امریکی صدر ڈونلڈ ٹرمپ کی جراتمند اور فیصلہ کن قیادت کو سراہا، اور اس پیش رفت کو خطے میں امن کے لیے اہم سنگِ میل قرار دیا۔ وزیرِ اعظم نے پاک بھارت جنگ بندی میں امریکہ کے کلیدی کردار پر سیکرٹری روبیو کا شکریہ بھی ادا کیا۔

فریقین نے پاکستان اور امریکہ کے دوطرفہ تعلقات کو مزید مستحکم بنانے، بالخصوص تجارت اور سرمایہ کاری کے شعبوں میں تعاون کو فروغ دینے پر اتفاق کیا۔

مشرقِ وسطیٰ کی تازہ ترین صورتحال پر تبادلہ خیال کرتے ہوئے وزیرِ اعظم نے اعادہ کیا کہ پاکستان خطے میں پائیدار امن کے قیام کے لیے اپنا تعمیری کردار جاری رکھے گا۔ سیکرٹری روبیو نے پاکستان کی ان کوششوں کو سراہا اور کہا کہ امریکہ مشرقِ وسطیٰ میں امن و استحکام کے لیے پاکستان کے ساتھ قریبی تعاون جاری رکھنا چاہتا ہے۔