عراق میں سڑک کنارے دھماکے سے 3سیاح جاں بحق

بغداد ۔27دسمبر (اے پی پی):عراق کے ایک صحرا میں سڑک کنارے نصب بم کے دھماکے میں 2کویتی اور ایک سعودی سیاح جاں بحق ہوگئے ہیں ۔چینی خبررسا ں ادارے نے عراقی فوج کے حوالےسے بتایا کہ عراقی سکیورٹی فورسز کو دو کویتی اور سعودی سیاحوں کی لاشیں ملی ہیں جو مغربی عراق کے ایک صحرا میں سڑک کنارے نصب بم کے دھماکے میں مارے گئے تھے۔

انہوں نے بتایا کہ مارے جانے والے سیاح سیاحتی ویز ا حاصل کر کے عراق میں داخل ہوئے تھے اور تینوں صوبوں الانبار، صلاح الدین اور نینویٰ تک پھیلا ہوا وسیع صحرا میں شکار کے سفر کے دوران لاپتہ ہوگئے تھے جس کے بعد عراقی سکیورٹی فورسز نے لاپتہ سیاحوں کی تلاش کے لیے صحرائے الانبار میں بڑے پیمانے پر تلاشی لی اور ان کی جلی ہوئی لاشیں برآمد کیں۔

انہوں نے مزید بتایاکہ ابتدائی شواہد سے معلوم ہوتا ہے کہ متاثرین کی گاڑی دہشت گردوں کی طرف سے سڑک کے کنارے نصب ایک پرانے بم سے ٹکرا گئی تھی۔