پاک امریکہ تعلقات کے حوالے سے ریاستی سطح پر ایک اور مثبت پیش رفت

پاک امریکہ تعلقات کے حوالے سے ریاستی سطح پر ایک اور مثبت پیش رفت

امریکی ریاست ٹیکساس میں 23 مارچ کو یوم پاکستان کے طور پر تسلیم کرنے کی قرارداد منظور

قرارداد میں پاکستانی نژاد امریکی کمیونٹی کی ریاست ٹیکساس میں سماجی، مذہبی، لسانی اور معاشی خدمات کا بھی اعتراف

نیو یارک کی ریاستی اسمبلی کی جانب سے گذشتہ دنوں یوم پاکستان اور پاکستان بزنس ڈے کے حوالے سے دو قرار دادیں منظور کی گئی

سفیر پاکستان رضوان سعید شیخ کا ٹیکساس اسمبلی کی جانب سے یوم پاکستان کے حوالے سے قرار داد منظور کرنے کا خیر مقدم

مختلف ریاستوں میں یوم پاکستان کے حوالے سے قرارداد وں کی منظوری ریاستی سطح پر پاک امریکہ تعلقات خصوصاً معاشی تعلقات کے فروغ کے حوالے سے انتہائی حوصلہ افزا پیش رفت ہے: پاکستانی سفیر

پاکستانی سفیر کا ایسی قراردوں کا دائرہ کار مزید ریاستوں تک بڑھانے کا عزم

قونصل جنرل محمد آفتاب چوہدری کی سپیکرٹیکساس اسمبلی ڈسٹن بروز سے ملاقات ۔ قرارداد کی منظوری میں ان کے کردار پر شکریہ ادا کیا

قونصل جنرل کی سپیکر ٹیکساس کو ریاستی نمائندوں اور تاجروں کے وفد کے ہمراہ پاکستان کے دورے کی دعوت
ہیوسٹن، 27 مارچ 2025
آج امریکی ریاست ٹیکساس کے ایوان نمائندگان نے ۲۳ مارچ کو یومِ پاکستان کے طور پر تسلیم کرنے کی قرارداد منظور کی۔
قرارداد میں پاکستانی نژاد امریکی کمیونٹی کی ریاست ٹیکساس میں سماجی، مذہبی، لسانی اور معاشی شراکت کو بھی تسلیم کیا گیا ہے۔ ریاستی نمائندے ڈاکٹر سلیمان لالانی کی طرف سے پیش کردہ قرارداد میں اس بات کا اعتراف کیا گیا ہے کہ ٹیکساس کی پاکستانی کمیونٹی نے اپنے پیشہ ورانہ کام، ثقافتی پس منظر اور امن و خوشحالی کی اقدار کے ذریعے ریاست کی کامیابی کو تقویت دی ہے۔

یاد رہے کہ گذشتہ دنوں نیو یارک کی ریاستی اسمبلی کی جانب سے بھی سفیر پاکستان کی موجودگی میں یوم پاکستان اور پاکستان بزنس ڈے کے حوالے سے دو قراردادیں منظور کی گئی تھیں۔

امریکہ میں سفیر پاکستان رضوان سعید شیخ نے ٹیکساس اسمبلی کی جانب سے یوم پاکستان کی قرارداد منظور کیے جانے کا خیر مقدم کرتے ہوئے کہا ہے کہ امریکہ کی مختلف ریاستوں میں یوم پاکستان کے حوالے سے قرارداد وں کا منظور کیا جانا ریاستی سطح پر پاک امریکہ تعلقات خصوصاً معاشی تعلقات کے فروغ کے حوالے سے انتہائی حوصلہ افزا پیش رفت ہے۔ انہوں نے کہا کہ ایسی قراردادوں کی منظوری کا سلسلہ دیگر ریاستوں خصوصاً ایسی ریاستوں جہاں پاکستانی کمیونٹی کثیر تعداد میں موجود ہے تک بڑھایا جائے گا۔

قونصل جنرل آفتاب چوہدری نے ایوان کے سپیکر مسٹر ڈسٹن بروز سے ان کے چیمبر میں ملاقات کی اور قرارداد کی منظوری میں ان کے کردار پر شکریہ ادا کیا۔ قونصل جنرل نے سپیکر کو ٹیکساس کے ریاستی نمائندوں اور تاجروں کے وفد کے ہمراہ پاکستان کے دورے کی دعوت دی۔
بعد ازاں، انہوں نے ریاستی نمائندے ڈاکٹر سلیمان لالانی کی طرف سے ٹیکساس کیپیٹل میں مقننہ کے دونوں ایوانوں کے اراکین اور مقامی معززین کے اعزاز میں دی گئی افطار میں بھی شرکت کی۔