متحدہ عرب امارات، ایئر العربیہ کا 10 جنوری سے کابل کے لیے روزانہ پروازیں شروع کرنے کا اعلان

ابو ظہبی۔28دسمبر (اے پی پی):متحدہ عرب امارات کی فضائی کمپنی ’’ایئرالعربیہ‘‘ نے افغانستان کے دارالحکومت کابل کے لیے 10 جنوری سے روزانہ پروازیں شروع کرنے کا اعلان کیا ہے ۔

اردو نیوز کے مطابق ایئرالعربیہ دوسری اماراتی ایئرلائن ہے جو افغان دارالحکومت کے لیے پروازیں چلائے گی۔ شارجہ سے چلنے والی ایئرلائن ’’ایئرالعربیہ‘‘ کی جانب سے جاری بیان کے مطابق کمپنی 10 جنوری سے کابل کے لیے روزانہ ایک براہ راست پرواز چلائے گی۔

کمپنی کے سی ای او عادل العلی نے کہا ہے کہ کابل کے لیے نئی پروازیں مسافروں کو مناسب قیمت پر سفری سہولت فراہم کرنے اور نئی منازل کی تلاش کے ہمارے عزم کا اظہار ہے۔ گزشتہ ماہ امارات ہی کی ایئرلائن ’’فلائی دبئی ‘‘پہلی بین الاقوامی کمپنی بن گئی جس نے افغانستان کے لیے پروازیں شروع کی تھیں۔