اسلام آباد۔30جولائی (اے پی پی):وزیراعظم محمد شہبازشریف نے کہا ہے کہ باجوڑ ، خار میں جمعیت علماء اسلام (ف) کے ورکرز کنونشن پر حملے کی جتنی بھی مذمت کی جائے کم ہے ، سیاسی جماعتوں پر حملے سے واضح ہے کہ دشمن پاکستان میں جمہوری نظام کے خلاف ہے جس کی قطعاً اجازت نہیں دی جائے گی ، ذمہ داران کی نشاندہی کر کے انہیں قرار واقعی سزا دی جائے گی ۔اتوار کواپنے ایک ٹویٹ میں وزیراعظم نے کہا کہ پاکستانی قوم ، قانون نافذ کرنے والے ادارے اور ہمارے محافظ دشمن کے ایسے بزدلانہ ہتھکنڈوں کو کبھی کامیاب نہیں ہونے دیں گے ۔ مجھ سمیت پوری قوم واقعہ میں شہید ہونے والوں کے اہل خانہ کے غم میں برابر کی شریک ہے ۔وزیراعظم نے کہاکہ مولانا فضل سے ٹیلی فون پر گفتگو میں نہ صرف میں نے ان سے تعزیت کی بلکہ واقعے کی تفصیلات کے بارے پوچھا ، میں نے وزیراعلیٰ ، چیف سیکرٹری اور آئی جی سے بھی ٹیلی فون پر گفتگو کی اور واقعے پر رپورٹ کے ساتھ ساتھ زخمیوں کو بہترین طبی سہولیات اور ہیلی کاپٹر سے ہسپتال پہنچانے کی ہدایت کی ہے ۔
Comments are closed.