دوسرے اسلامی ممالک کی طرح پاکستان میں بھی واضح پاپولیشن مینجمنٹ حکمتِ عملی ناگزیر ہے: عظمیٰ بخاری

 لاہور() وزیر اطلاعات و ثقافت پنجاب عظمیٰ بخاری نے کہا کہ آبادی میں توازن قومی ترقی، سماجی استحکام اور عوامی فلاح کے لیے بنیادی اہمیت رکھتا ہے۔انہوں نے اس بات پر زور دیا کہ دنیا بھر خصوصاً اسلامی ممالک نے پاپولیشن مینجمنٹ کے حوالے سے واضح حکمتِ عملی اپنائی ہے، اور پاکستان میں بھی اس پالیسی کو مؤثر طریقے سے آگے بڑھانے کی ضرورت ہے۔عظمیٰ بخاری نے کہا کہ پنجاب حکومت فیملی پلاننگ کو گھر گھر تک پہنچانے کے لیے ایک بڑا اقدام اٹھا رہی ہے، جس کے تحت 60 ہزار کمیونٹی آفیسرز کی بھرتی کا عمل شروع کیا جا رہا ہے۔ یہ آفیسرز گھروں میں جا کر فیملی پلاننگ کے بارے میں آگاہی فراہم کریں گے اور متعلقہ سہولیات لوگوں کی دہلیز پر پہنچائیں گے۔وزیر اطلاعات نے کہا کہ ہر فرد کو اپنے گھرانے کا سائز اپنی معاشی استطاعت اور معیارِ زندگی خود طے کرنا چاہیے۔حکومت، علما کرام اور کمیونٹی ادارے رہنمائی فراہم کر سکتے ہیں، لیکن عملی فیصلہ ہر خاندان نے خود کرنا ہے۔انہوں نے کہا کہ دانشمندی اسی میں ہے کہ ایسے کنبے کی تشکیل کی جائے جسے معیاری تعلیم، بہترین صحت سہولیات، مناسب رہائش اور باوقار زندگی فراہم کی جا سکے۔وزیر اطلاعات نے اس موقع پر ڈان میڈیا گروپ کے کردار کو خصوصی طور پر سراہا۔ انہوں نے کہا کہ پاکستان میں اکثر سیاسی بحثوں نے سماجی ایشوز کو پسِ پشت ڈال دیا ہے، جبکہ ڈان نے ہمیشہ اہم سماجی موضوعات کو اجاگر کیا ہے۔انہوں نے کہا کہ اسموگ کے مسئلے پر ڈان نے حکومت پنجاب کے ساتھ مل کر بہترین آگاہی مہم چلائی، اور اب زیادہ آبادی جیسے اہم قومی ایشو کو جس سنجیدگی سے ڈان نے اٹھایا ہے، وہ قابلِ تحسین ہے۔ میری نیک خواہشات اور مکمل تعاون ڈان کے ساتھ ہے۔عظمیٰ بخاری نے زور دیتے ہوئے کہا کہ حکومت پنجاب پاپولیشن اسٹیبلائزیشن کو قومی ضرورت سمجھتے ہوئے تمام متعلقہ اداروں کے ساتھ تعاون کو مزید مضبوط بنا رہی ہے۔ذمہ دار شہری، ذمہ دار فیصلوں کے ذریعے ایک خوشحال پاکستان کی بنیاد رکھ سکتے ہیں۔