آٹھویں میری ٹائم سیکیورٹی ورکشاپ کے شرکاء کا نیول ہیڈکوارٹرز کا دورہ

اسلام آباد، 04 دسمبر 2025: آٹھویں میری ٹائم سیکیورٹی ورکشاپ (MARSEW-8) کے شرکاء نے نیول ہیڈکوارٹرز، اسلام آباد کا دورہ کیا۔ دورے کے دوران، چیف آف دی نیول اسٹاف ایڈمرل نوید اشرف نے شرکاء سے ملاقات کی اور ابھرتے ہوئے میری ٹائم چیلنجز، بحری شعبے میں بدلتے ہوئے مواقع اور پاکستان کی بلیو اکانومی کی بھرپور صلاحیت پر روشنی ڈالی۔ نیول چیف نے معرکہ حق کے دوران پاک بحریہ کے ناقابل تسخیر دفاع پر تفصیلی گفتگو کی اور شرکاء کو کمبائنڈ میری ٹائم فورسز میں شرکت اور ریجنل میری ٹائم سیکیورٹی پٹرولز کے ذریعے علاقائی امن و استحکام کے لیےپاک بحریہ کی کاوشوں سے آگاہ کیاـ –

قبل ازیں شرکاء کو موجودہ میری ٹائم خطرات، پاک بحریہ کی میری ٹائم آگہی کے اقدامات اور ساحلی آبادیوں کی ترقی کے منصوبوں پر بریفنگ دی گئی۔ پارلیمنٹرینز، سیاستدانوں، بیوروکریٹس، سینیئر عسکری افسران، میڈیا نمائندگان، انٹرپرینیورز، بزنس لیڈرز اور ماہرین تعلیم پر مشتمل سکیورٹی ورکشاپ کے شرکاء نے قومی سطح پر بحری آگہی اور پالیسی سازی میں میری ٹائم سیکیورٹی ورکشاپ کے اہم کردار کو تسلیم کیا اور قومی بحری مفادات کے تحفظ کے لیے پاک بحریہ کے غیر متزلزل عزم کو سراہا ۔

یہ گیارہ روزہ ورکشاپ شرکاء کی میری ٹائم سیکیورٹی سے متعلق فہم میں اضافہ اور بحرِ ہند کی جیو اسٹریٹیجک اہمیت کو اجاگر کرنے کے ساتھ ساتھ قومی بحری چیلنجز اور مواقع پر سیرحاصل گفتگو کے لیے ایک مؤثر پلیٹ فارم فراہم کرتی ہے۔

ڈائریکٹر جنرل پبلک ریلیشنز (نیوی)