اینٹی نارکوٹکس فورس کی بین الاقوامی منشیات اسمگلروں کے خلاف ایک اور بڑی کامیابی

اسلام آباد، 9 اکتوبر 2025:
اینٹی نارکوٹکس فورس (اے این ایف) نے بین الاقوامی منشیات اسمگلنگ نیٹ ورک کے خلاف ایک اور بڑی کارروائی میں متحدہ عرب امارات میں ہیروئن اسمگل کرنے والے منظم گروہ کو بے نقاب کر کے نیٹ ورک کے مرکزی سرغنے ندیم خان سمیت 11 ملزمان کو گرفتار کر لیا۔ گرفتار افراد میں چار خواتین اور ایک فارماسسٹ بھی شامل ہیں۔

ترجمان اے این ایف کے مطابق، خفیہ اطلاعات پر کی گئی کارروائی میں انکشاف ہوا کہ یہ بین الاقوامی نیٹ ورک ملک کے مختلف شہروں سے تعلق رکھنے والے غریب اور کم پڑھے لکھے نوجوان جوڑوں کو سہانے مستقبل کے جھوٹے خواب دکھا کر منشیات کی اسمگلنگ کے لیے استعمال کر رہا تھا۔ اسمگلنگ کے لیے ہیروئن کو کیپسولز کی صورت میں تیار کر کے نوجوانوں کے پیٹ میں چھپایا جاتا تھا تاکہ انہیں بیرون ملک لے جایا جا سکے۔

اے این ایف کی جدید تکنیکی اور ڈیجیٹل نگرانی کے نتیجے میں اس نیٹ ورک کے متعدد ارکان کی نشاندہی کی گئی۔ بہتر مانیٹرنگ کے باعث ملک کے دو مختلف ہوائی اڈوں سے چار نوجوان جوڑے گرفتار کیے گئے جن کے پیٹ سے ہیروئن سے بھرے کیپسول برآمد ہوئے۔

مزید تحقیقات کے دوران اے این ایف نے تین سہولت کاروں سمیت نیٹ ورک کے اہم کرداروں کو بھی گرفتار کیا۔ ترجمان کے مطابق دیگر مفرور ملزمان کی نشاندہی ہو چکی ہے اور انہیں بھی جلد قانون کے کٹہرے میں لایا جائے گا۔

اے این ایف نے کہا کہ محدود وسائل کے باوجود فورس بین الاقوامی منشیات کے نیٹ ورکس کے مکمل خاتمے کے لیے پرعزم ہے۔ ترجمان نے واضح کیا کہ پاکستان سے کسی بھی خلیجی ملک کو منشیات اسمگل نہیں ہونے دی جائے گی اور یہ جنگ بھرپور انداز میں جاری رہے گی۔