پاکستان اور روس کے درمیان پہلی سیکیورٹی مشاورت، ایشیا میں ابھرتی ہوئی تزویراتی صورتحال پر تفصیلی گفتگو

عسکر انٹرنیشنل رپورٹ

پاکستان اور روس کے درمیان پہلی سیکیورٹی مشاورت، ایشیا میں ابھرتی ہوئی تزویراتی صورتحال پر تفصیلی گفتگواسلام آباد — پاکستان اور روس کے درمیان پہلی بار باضابطہ سیکیورٹی مشاورت منعقد ہوئی، جس میں ایشیا میں بدلتی ہوئی تزویراتی صورتحال، علاقائی سلامتی کے چیلنجز اور نئی جیو پولیٹیکل صف بندیوں پر تفصیلی تبادلہ خیال کیا گیا۔

دفتر خارجہ کے مطابق روسی وزارتِ خارجہ کے ڈائریکٹر جنرل برائے ایشیا پیسیفک امور الیکسی اووچینیکوف نے اعلیٰ سطحی روسی وفد کی قیادت کرتے ہوئے پاکستان کے ترجمان اور ایڈیشنل سیکرٹری خارجہ طاہر اندازربی سے تفصیلی ملاقات کی۔

روسی وفد نے ایڈیشنل سیکرٹری ایشیا پیسیفک عمران صدیقی اور انسٹیٹیوٹ آف اسٹریٹجک اسٹڈیز اسلام آباد (ISSI) کے ڈائریکٹر جنرل سہیل محمود سے بھی الگ الگ ملاقاتیں کیں، جن میں علاقائی تزویراتی ماحول پر گہرے مشاورتی تبادلات ہوئے۔

ایشیا میں نئی تزویراتی صف بندیوں پر گفتگو

دونوں ممالک کے درمیان مشاورت میں درج ذیل اہم امور شامل رہے:

خطے میں سیکورٹی کے بدلتے ہوئے ڈھانچے

نئی اور ابھرتی ہوئی عالمی و علاقائی شراکت داریاں

پاکستان اور روس کے درمیان تعاون بڑھانے کے امکانات

ایشیا میں امن و استحکام کے مشترکہ مفادات

دفتر خارجہ نے کہا کہ پاکستان روس کے ساتھ تعلقات کو قدر کی نگاہ سے دیکھتا ہے اور علاقائی امن و استحکام کے لیے سفارتی کوششوں کو مضبوط بنانے کے لیے پرعزم ہے۔

دونوں ممالک نے فیصلہ کیا کہ یہ مشاورتی سلسلہ مستقل بنیادوں پر جاری رکھا جائے گا تاکہ دوطرفہ تعلقات کو مزید مستحکم کیا جا سکے اور بدلتی ہوئی جیو پولیٹیکل صورتحال کا مؤثر طور پر مقابلہ کیا جا سکے۔