اسپیکر ایاز صادق اور اسپیکر مالدیپ کی ملاقات، دوطرفہ تعلقات اور عالمی امور پر تبادلہ خیال

اسلام آباد (نمائندہ خصوصی)اسپیکر قومی اسمبلی سردار ایاز صادق کی دعوت پر مالدیپ کی عوامی مجلس کے اسپیکر عبدالرحیم عبداللہ پارلیمانی وفد کے ہمراہ پارلیمنٹ ہاؤس پہنچے، جہاں اسپیکر قومی اسمبلی نے مہمانوں کا پرتپاک خیرمقدم کیا۔

ملاقات کے دوران دونوں ممالک کے مابین پارلیمانی تعلقات کو مزید مستحکم بنانے سمیت علاقائی اور عالمی امور پر تبادلہ خیال کیا گیا۔ دونوں رہنماؤں نے دوطرفہ پارلیمانی تعاون اور عوامی روابط بڑھانے پر اتفاق کیا۔

اس موقع پر اسپیکر قومی اسمبلی سردار ایاز صادق نے کہا کہ پاکستان اور مالدیپ مشترکہ مذہب، تاریخ اور ثقافت کے رشتوں میں جُڑے ہیں۔ خطے میں امن و ترقی کے فروغ کے لیے پارلیمانی سفارتکاری ناگزیر ہے۔ انہوں نے کہا کہ مسئلہ فلسطین اور کشمیر کے حل کے بغیر خطے میں پائیدار امن ممکن نہیں۔ عالمی برادری ان مسائل کے منصفانہ حل کے لیے کردار ادا کرے۔

انہوں نے زور دیا کہ مسلم اُمہ کو فلسطین اور کشمیر کے عوام کے حق میں مشترکہ لائحہ عمل اپنانا ہوگا۔ اسپیکر نے کہا کہ پاکستانی افواج اور عوام دہشتگردی کے خلاف بہادری سے برسرِپیکار ہیں۔ اسرائیل اور بھارت کا گٹھ جوڑ خطے اور دنیا کے امن کے لیے بڑا خطرہ ہے۔ قطر پر اسرائیلی بمباری کی مسلم ممالک کی اجتماعی مذمت بروقت اقدام ہے۔

سردار ایاز صادق نے کہا کہ اسرائیل نے انسانیت کی تمام حدود پار کر دی ہیں، فلسطینی عوام کی نسل کشی کر رہا ہے اور خطے کے ممالک کی سرحدوں کی خلاف ورزی کر کے عالمی امن کے لیے سنگین خطرہ بن چکا ہے۔ انہوں نے مقبوضہ کشمیر میں بھارتی مظالم کی شدید مذمت کرتے ہوئے واضح کیا کہ کشمیری عوام کی جدوجہدِ آزادی کو پاکستان ہر سطح پر حمایت دیتا رہے گا۔

اسپیکر نے بھارت کے خلاف پاکستان کی حالیہ فتح پر قوم اور افواجِ پاکستان کو خراجِ تحسین پیش کرتے ہوئے کہا کہ یہ کامیابی پوری قوم کے اتحاد اور افواج کی جرات و قربانیوں کا ثمر ہے۔ پاکستان ہمیشہ بھارتی جارحیت کے مقابلے میں سرخرو ہوا ہے۔

.انہوں نے کہا کہ سارک کو مزید فعال کرنے کی ضرورت ہے اور پاکستان میں تجارت کے وسیع مواقع موجود ہیں۔ دوطرفہ رابطوں کے فروغ سے دونوں ممالک کے عوام مزید قریب آئیں گے۔ انہوں نے کہا کہ پاک-مالدیپ فرینڈشپ گروپ دونوں ممالک میں پارلیمانی رابطوں کے فروغ میں کلیدی کردار ادا کر رہا ہے۔

اس موقع پر اسپیکر مالدیپ عبدالرحیم عبداللہ نے پاکستان آمد پر شاندار استقبال پر شکریہ ادا کرتے ہوئے کہا کہ پاکستان اور مالدیپ کے تعلقات برادرانہ اور باہمی احترام پر مبنی ہیں۔ انہوں نے کہا کہ مسئلہ فلسطین اور کشمیر پر پاکستان کا دوٹوک مؤقف قابلِ ستائش ہے اور پارلیمانی سطح پر قریبی روابط دونوں ممالک کے عوام کو مزید قریب لائیں گے۔