اسلام آباد: رئیسُ الاحرار چوہدری غلام عباس کی 58ویں برسی — تحریکِ آزادیٔ کشمیر کے عظیم رہنما کو شاندار خراجِ عقیدت
کل جماعتی حریت کانفرنس آزاد جموں و کشمیر شاخ کے کنوینر غلام محمد صفی نے رئیسُ الاحرار چوہدری غلام عباس کی 58ویں برسی کے موقع پر اسلام آباد سے جاری اپنے ایک مفصل بیان میں تحریکِ آزادیٔ کشمیر کے اس عظیم رہنما کی بے مثال جدوجہد، لازوال قربانیوں اور تاریخی خدمات کو زبردست خراجِ عقیدت پیش کیا ہے۔
غلام محمد صفی نے کہا کہ چوہدری غلام عباس تحریکِ آزادیٔ کشمیر کے اُن درخشاں ستاروں میں شامل ہیں جنہوں نے اپنی پوری زندگی کشمیری عوام کی آزادی، عزت و وقار اور حقِ خودارادیت کے لیے وقف کر دی۔ انہوں نے کہا کہ ریاست جموں و کشمیر کا پاکستان کے ساتھ الحاق رئیسُ الاحرار کا ایک واضح اور غیر متزلزل خواب تھا، جس کی تعبیر کے لیے انہوں نے آخری سانس تک جدوجہد جاری رکھی اور کسی قسم کے دباؤ، لالچ یا جبر کے سامنے سر تسلیم خم نہیں کیا۔
کنوینر حریت کانفرنس نے کہا کہ رئیسُ الاحرار چوہدری غلام عباس نہ صرف ایک باکردار، باعمل اور بااصول سیاستدان تھے بلکہ ایک درویش صفت، خدا ترس اور امتِ مسلمہ کے درد کو اپنے دل میں سموئے رکھنے والی عظیم شخصیت بھی تھے۔ انہوں نے برصغیر کے مسلمانوں بالعموم اور کشمیری مسلمانوں بالخصوص کو انگریز سامراج اور بعد ازاں ڈوگرہ راج کے ظلم و استبداد سے نجات دلانے کے لیے عملی جدوجہد کی، جس کے نتیجے میں انہیں متعدد بار قید و بند، تشدد اور مصائب کا سامنا کرنا پڑا، مگر وہ کبھی اپنے اصولی موقف سے پیچھے نہیں ہٹے۔
غلام محمد صفی نے مزید کہا کہ رئیسُ الاحرار کی سیاسی بصیرت، فکری استقامت اور قربانیوں نے تحریکِ آزادیٔ کشمیر کو ایک مضبوط نظریاتی بنیاد فراہم کی۔ انہوں نے اپنی جوانی کے ابتدائی ایام سے ہی کشمیری عوام میں سیاسی شعور بیدار کرنے، مسلم تشخص کے تحفظ اور حقِ خودارادیت کے حصول کے لیے ناقابلِ فراموش خدمات انجام دیں، جو آج بھی تحریک کے لیے مشعلِ راہ ہیں۔
انہوں نے کہا کہ چوہدری غلام عباس کو کشمیر کی تاریخ میں ایک روشن باب اور تحریکِ آزادی کے ایک ابدی استعارے کے طور پر ہمیشہ یاد رکھا جائے گا۔ ان کی جدوجہد اس بات کی گواہ ہے کہ اصولی سیاست، اخلاص اور قربانی کے ذریعے قوموں کی تقدیر بدلی جا سکتی ہے۔
بیان کے اختتام پر غلام محمد صفی نے کہا کہ رئیسُ الاحرار کو حقیقی خراجِ عقیدت پیش کرنے کا بہترین طریقہ یہ ہے کہ ہم سب متحد ہو کر ان کے ادھورے مشن کو پایۂ تکمیل تک پہنچانے کے لیے اپنی جدوجہد کو مزید منظم، پُرامن اور مؤثر بنائیں، اور اقوامِ متحدہ کی قراردادوں کے مطابق کشمیری عوام کے حقِ خودارادیت کے حصول تک اپنی اصولی تحریک جاری رکھیں۔
Comments are closed.