وزیراعظم: صدر ٹرمپ عالمی امن کے قیام کے لیے سنجیدہ اقدامات کر رہے ہیں

نیویارک (ویب ڈیسک)امریکی صدر ڈونلڈ ٹرمپ نے عرب اسلامی سربراہی اجلاس کے اختتام پر وزیراعظم پاکستان شہباز شریف سے خوشگوار اور غیر رسمی ملاقات کی۔ ملاقات میں دونوں رہنماؤں نے دوستانہ ماحول میں بات چیت کی اور مصافحہ کیا، جبکہ نائب وزیراعظم اسحاق ڈار بھی موجود تھے۔

ذرائع کے مطابق وزیراعظم شہباز شریف اور صدر ٹرمپ کے درمیان 25 ستمبر کو ایک ون آن ون ملاقات کا امکان ہے جس میں اہم عالمی و علاقائی امور پر تفصیلی تبادلہ خیال متوقع ہے۔

اسی دوران اقوام متحدہ کی جنرل اسمبلی کے اجلاس کے موقع پر نجی نیوز چینل کو خصوصی انٹرویو دیتے ہوئے وزیراعظم شہباز شریف نے کہا کہ امریکی صدر عالمی امن کے قیام کے لیے سنجیدہ اقدامات کر رہے ہیں۔

وزیراعظم نے کہا کہ صدر ٹرمپ کے خطاب میں اہم نکات شامل تھے، جن میں پاک بھارت کشیدگی کم کرنے کے لیے ان کا کلیدی کردار بھی نمایاں ہے۔ انہوں نے اعادہ کیا کہ پاکستان خطے میں امن و استحکام کے لیے اپنا بھرپور کردار ادا کرے گا اور عالمی برادری کے ساتھ مل کر مسائل کے پائیدار حل کی کوشش جاری رکھے گا۔