عسکر انٹرنیشنل رپورٹ
اسلام آباد، 27 اکتوبر 2025ء
اسلام آباد فوڈ اتھارٹی کی جانب سے وفاقی دارالحکومت میں گرینڈ آپریشن کے دوران 10 ہزار 890 لیٹر دودھ کی چیکنگ کی گئی، جس میں سے 2 ہزار 340 لیٹر ملاوٹی دودھ تلف کر دیا گیا۔
آپریشن کے دوران 20 دودھ بردار گاڑیوں کی جانچ کی گئی، جن میں سے 17 پاس اور 3 فیل قرار پائیں۔ قوانین کی خلاف ورزیوں اور سیمپل فیل ہونے پر ایک لاکھ 18 ہزار روپے کے جرمانے عائد کیے گئے۔
ڈائریکٹر جنرل اسلام آباد فوڈ اتھارٹی کی ہدایت پر یہ کارروائی این-5 میٹرو اسٹیشن نمبر 26 پر علی الصبح ناکہ بندی کے ذریعے کی گئی۔
ڈپٹی ڈائریکٹر اسلام آباد فوڈ اتھارٹی ڈاکٹر طاہرہ صدیق کے مطابق تلف شدہ دودھ میں ملاوٹ اور معیار کی سنگین کمی پائی گئی۔ انہوں نے کہا کہ ناکہ بندی کے ذریعے غیر معیاری دودھ کی سپلائی کو ناکام بنایا گیا۔
ڈاکٹر طاہرہ صدیق نے مزید کہا کہ دودھ کے معیار پر زیرو ٹالرنس پالیسی پر عمل جاری ہے اور غذائیت سے بھرپور خالص دودھ کی فراہمی میں کسی قسم کی کوتاہی برداشت نہیں کی جائے گی۔
انہوں نے خبردار کیا کہ ملاوٹی دودھ کا استعمال بچوں اور بزرگوں میں مختلف بیماریوں کا سبب بن سکتا ہے، جبکہ دودھ کے معیار کو بہتر بنانے کے لیے کارروائیاں دن رات جاری ہیں۔
ادھر عسکر انٹرنیشنل کے نامہ نگار کے مطابق، اگرچہ اسلام آباد فوڈ اتھارٹی کی کارروائیاں قابلِ تحسین ہیں، تاہم وفاقی دارالحکومت میں تقریباً ہر دکان پر دوہرا معیارِ دودھ فروخت ہو رہا ہے۔ خالص دودھ کی فراہمی اور جانچ کے باوجود شہریوں کو اب بھی ملاوٹی یا کم درجے کے دودھ کا سامنا ہے، جس کے لیے مزید سخت نگرانی اور باقاعدہ لیبارٹری ٹیسٹنگ کا نظام ناگزیر ہے۔
Comments are closed.