یومِ سیاہ کشمیر کے موقع پر گورنر خیبرپختونخوا فیصل کریم کنڈی کا پیغام

 گورنر خیبرپختونخوا فیصل کریم کنڈی نے یومِ سیاہ کشمیر کے موقع پر اپنے پیغام میں کہا ہے کہ 27 اکتوبر 1947ء کو بھارتی افواج نے جموں و کشمیر پر غیر قانونی قبضہ کیا، جو اقوامِ متحدہ کی قراردادوں اور بین الاقوامی قوانین کی صریح خلاف ورزی تھی۔

انہوں نے کہا کہ آج کا دن اس غیر قانونی قبضے کے خلاف احتجاج اور کشمیری عوام سے اظہارِ یکجہتی کے طور پر منایا جاتا ہے۔

گورنر نے کہا کہ کشمیری عوام گزشتہ سات دہائیوں سے بدترین بھارتی ریاستی جبر کا سامنا کر رہے ہیں، لیکن اس کے باوجود وہ آزادی کے اپنے جائز حق سے پیچھے نہیں ہٹے۔

انہوں نے اقوامِ متحدہ سے مطالبہ کیا کہ وہ کشمیری عوام کو ان کا بنیادی حق، حقِ خود ارادیت دلوانے میں مؤثر کردار ادا کرے۔

فیصل کریم کنڈی نے کہا کہ پاکستانی حکومت اور عوام، کشمیری بھائیوں کے ساتھ شانہ بشانہ کھڑے ہیں اور ان کی اخلاقی، سیاسی اور سفارتی حمایت جاری رکھیں گے۔

آخر میں گورنر نے کہا کہ ہمارا ایمان ہے کہ ظلم ہمیشہ کے لیے غالب نہیں رہ سکتا۔ کشمیری عوام کی عظیم قربانیاں ضرور رنگ لائیں گی اور وہ جلد بھارتی تسلط سے آزادی حاصل کریں گے۔