کاشغر میں صدر آصف علی زرداری کے اعزاز میں عشائیہ

کاشغر (نمائندہ خصوصی) چین کے شہر کاشغر میں صدر آصف علی زرداری کے اعزاز میں شاندار عشائیہ دیا گیا۔ اس عشائیے کا اہتمام سنکیانگ کے نائب گورنر نی ژوانگ نے کیا جس میں سینیٹر سلیم مانڈوی والا، پاکستان اور چین کے سفراء سمیت دیگر شخصیات نے بھی شرکت کی۔

صدر آصف علی زرداری نے پرتپاک میزبانی پر میزبانوں کا شکریہ ادا کرتے ہوئے کہا کہ چینی شہروں کی ترقی متاثر کن ہے اور چینی عوام کی گرم جوشی ہمیشہ انہیں مثبت توانائی دیتی ہے۔ انہوں نے صدر شی جن پنگ کی وژنری قیادت کو خراجِ تحسین پیش کیا اور کہا کہ پاکستان اور چین کی دوستی وقت کی کسوٹی پر ہمیشہ پوری اتری ہے۔

اس موقع پر نائب گورنر نی ژوانگ نے کہا کہ کاشغر اور پاکستان کے عوام صدیوں پرانے رشتوں میں جڑے ہیں۔ کاشغر پاکستان کے ساتھ تجارت، ثقافت اور عوامی تبادلوں کو مزید فروغ دینے کا خواہاں ہے۔