عسکر انٹرنیشنل رپورٹ
خصوصی رپورٹ
اسلام آباد، 20 اکتوبر — اینٹی نارکوٹکس فورس (اے این ایف) نے ملک کے مختلف شہروں اور تعلیمی اداروں کے اطراف میں منشیات فروشوں کے خلاف بھرپور کارروائیاں کرتے ہوئے خاتون اور افغان باشندے سمیت 9 ملزمان کو گرفتار کرلیا۔ ترجمان اے این ایف کے مطابق فورس نے 10 کامیاب کارروائیوں کے دوران مجموعی طور پر 200 کلوگرام منشیات برآمد کیں جن کی مالیت 12 کروڑ 36 لاکھ روپے سے زائد ہے۔ کارروائیاں تعلیمی اداروں کے اطراف منشیات کی فروخت روکنے کے لیے خصوصی مہم کے تحت عمل میں لائی گئیں۔ چناب ٹول پلازہ گجرات کے قریب ایک خاتون کے قبضے سے 4.320 کلوگرام ہیروئن اور 400 گرام آئس جبکہ فاروق اعظم کالونی اٹک میں واقع ایک یونیورسٹی کے قریب موٹر سائیکل سوار کے قبضے سے 600 گرام چرس برآمد کی گئی۔ گرفتار ملزمان نے انکشاف کیا کہ وہ تعلیمی اداروں کے طلباء کو منشیات فروخت کرتے تھے۔
بین الاقوامی کارروائیوں کے دوران جناح انٹرنیشنل ایئرپورٹ کراچی پر ریاض جانے والے مسافر کے سامان میں مٹھائی کے ڈبوں سے 1.990 کلوگرام وزنی 13 ہزار زینیکس گولیاں برآمد ہوئیں۔ طارق روڈ کراچی کے کوریئر آفس سے برطانیہ بھیجے گئے پارسل سے 1.620 کلوگرام ہیروئن، جبکہ عامر ٹاؤن کینال روڈ لاہور کے کوریئر آفس سے آسٹریلیا بھیجے گئے پارسل سے 990 گرام آئس برآمد کی گئی جسے کپڑوں کے ٹکڑوں میں بھگو کر جوتوں کے اگلے حصے میں چھپایا گیا تھا۔ چکلالہ گیریژن راولپنڈی میں واقع کوریئر آفس میں امریکہ سے آئے پارسل کے کھلونوں کے اندر سے 14 گرام ویڈ برآمد ہوئی۔
اندرون ملک اور بین الصوبائی کارروائیوں کے دوران کامرہ روڈ اٹک کے قریب گاڑی سے 2.59 کلوگرام ہیروئن اور 2.1 کلوگرام آئس برآمد کی گئی، جبکہ افغان باشندے سمیت دو افراد کو گرفتار کیا گیا۔ ہزارہ ایکسپریس وے تھاکوٹ کے قریب گاڑی سے 14.4 کلوگرام چرس برآمد ہوئی اور دو افراد گرفتار ہوئے۔ ویسٹرن بائی پاس ہزار گنجی، کوئٹہ میں 86 کلوگرام ہیروئن اور 80 کلوگرام چرس برآمد کی گئی جبکہ لک پاس ٹول پلازہ، کوئٹہ کے قریب ایک گاڑی سے 5 کلوگرام آئس برآمد ہوئی اور دو ملزمان کو گرفتار کر لیا گیا۔ تمام مقدمات انسداد منشیات ایکٹ 1997 کے تحت درج کر کے مزید تحقیقات شروع کر دی گئی ہیں تاکہ بین الصوبائی اور بین الاقوامی منشیات فروش نیٹ ورکس کو ختم کیا جا سکے۔
Comments are closed.