وزیراعظم شہباز شریف سے اسٹریلوی ہائی کمشنر کی ملاقات، وزیراعظم کا دہشت گرد ی کے واقعہ میں معصوم جانوں کے نقصان پر گہرے رنج و غم کا اظہار

 اسلام آباد۔19دسمبر :وزیر اعظم محمد شہباز شریف نے بونڈائی بیچ سڈنی میں دہشت گردوں کی فائرنگ سے معصوم جانوں کے نقصان پر گہرے دکھ اور افسوس کا اظہار کرتے ہوئے دہشت گردی کی اس بزدلانہ کارروائی کی مذمت اور آسٹریلیا کے ساتھ یکجہتی کا اظہار کیا ہے اور پاکستان اور آسٹریلیا کے مابین دوطرفہ تجارت اور سرمایہ کاری کو وسعت دینے اور زراعت اور لائیو سٹاک کے شعبوں میں تعاون بڑھانے پر زور دیا ہے۔ وزیر اعظم آفس کے میڈیا ونگ کی طرف سے جاری بیان کے مطابق وزیر اعظم محمد شہباز شریف سے پاکستان میں آسٹریلیا کے نئے تعینات ہونے والے ہائی کمشنر ٹم کین نے جمعہ کو یہاں ملاقات کی۔ نائب وزیراعظم و وزیر خارجہ سینیٹر محمد اسحاق ڈار ، معاون خصوصی طارق فاطمی اور سیکرٹری خارجہ بھی ملاقات میں موجود تھے۔ وزیراعظم نے ہائی کمشنر کو ان کی تقرری پر مبارکباد پیش کی اور اس اعتماد کا اظہار کیا کہ ان کی تعیناتی سے پاکستان اور آسٹریلیا کے درمیان دیرینہ اور دوستانہ تعلقات مزید مستحکم ہوں گے۔وزیراعظم نے 14 دسمبر 2025 کو بونڈائی بیچ سڈنی میں دہشت گردوں کی فائرنگ میں معصوم جانوں کے نقصان پر گہرے رنج و غم کا اظہار کرتے ہوئے کہا کہ پاکستان دہشت گردی کی اس بزدلانہ کارروائی کی بھرپور مذمت کرتا ہے۔دکھ کی اس گھڑی میں آسٹریلیا کے ساتھ پاکستان کی یکجہتی کا اعادہ کرتے ہوئے وزیراعظم نے اس بات پر زور دیا کہ دہشت گردی کا کوئی مذہب نہیں ہوتا اور اس کی ہر شکل اور صورت میں مذمت کی جانی چاہیے جب کہ اس لعنت کے خاتمے کے لیے اجتماعی کارروائی کی ضرورت ہے۔پاکستان آسٹریلیا تعلقات کے مثبت پہلوو ¿ں کو اجاگر کرتے ہوئے وزیراعظم نے دوطرفہ تجارت اور سرمایہ کاری کو وسعت دینے کی ضرورت پر زور دیا اور زراعت اور لائیو سٹاک کے شعبوں میں تعاون بڑھانے کی خواہش کا اظہار کیا۔ انہوں نے کان کنی اور معدنیات کے شعبے میں آسٹریلوی دلچسپی کا بھی خیرمقدم کیا۔ وزیراعظم نے ریکوڈک کو پاکستان میں اس شعبے کی بے پناہ صلاحیت کی حامل ایک روشن مثال قرار دیا۔ انہوں نے آسٹریلیا میں مقیم پاکستانیوں کی گراں قدر خدمات کو بھی سراہا جس نے دونوں ممالک کے درمیان ایک اہم پل کا کام کیا ہے۔ وزیر اعظم نے کرکٹ کے لیے دونوں اقوام کے مشترکہ جذبے سمیت پاکستان اور آسٹریلیا کے درمیان مضبوط روابط اور ثقافتی رشتوں کی اہمیت پر زور دیا۔ ملاقات کے دوران وزیر اعظم نے آسٹریلوی قیادت کے لیے نیک خواہشات کا اظہار کرتے ہوئے کہا کہ وہ دونوں ممالک کے درمیان مضبوط تعلقات استوار کرنے کے لیے ان کے ساتھ مل کر کام کرنے کے منتظر ہیں۔ ٹم کین نے وزیراعظم کا شکریہ ادا کرتے ہوئے باہمی دلچسپی کے تمام شعبوں میں پاکستان اور آسٹریلیا کے مابین تعلقات کو مزید فروغ دینے کے لیے کام کرنے کی گہری خواہش کا اظہار کیا