لورالائی میں ملیریا کی تشخیص اور علاج سے متعلق تین روزہ تربیتی پروگرام جاری

1

عسکر انٹرنیشنل رپورٹ

لورالائی، 21 نومبر: بلوچستان رورل سپورٹ پروگرام کے زیرِ اہتمام ای پی آئی ہال لورالائی میں ملیریا کی تشخیص، علاج، کیس مینجمنٹ اور نگرانی سے متعلق تین روزہ تربیتی پروگرام کے دوسرے روز کا سیشن منعقد ہوا۔ اجلاس کی صدارت ڈسٹرکٹ ہیلتھ آفیسر لورالائی ڈاکٹر محمد فہیم خان نے کی۔

تربیتی پروگرام میں محکمہ صحت، بلوچستان رورل سپورٹ پروگرام اور دیگر متعلقہ اداروں کے نمائندوں نے شرکت کی۔ شرکاء میں ایم اسحاق، ڈسٹرکٹ پروگرام کوآرڈینیٹر، امین اللہ، میل آفیسر آئی ایچ ایچ این، امیر عثمان، ڈسٹرکٹ لیبارٹری آفیسر اور امیر عزیز، ڈی ایم یو انچارج شامل تھے۔

ماسٹر ٹرینرز ڈاکٹر شاہ زمان حمزہ زئی اور جلال شاہ نے شرکاء کو ملیریا کی تشخیص، علاج، مریضوں کی دیکھ بھال اور بیماری کی مؤثر نگرانی کے حوالے سے تفصیلی تربیت فراہم کی۔

تربیتی سیشن میں ضلع کے مختلف مراکز صحت سے تعلق رکھنے والے 35 فوکل پرسنز نے شرکت کی، جن میں میڈیکل اسٹورز، لیبارٹریز اور کلینکس کا عملہ بھی شامل تھا۔

شرکاء کو ملیریا کے مشتبہ مریضوں کی بروقت شناخت، تشخیصی طریقہ کار، کیس مینجمنٹ، علاج کے مقررہ اصولوں پر عمل درآمد اور بیماری کا درست ریکارڈ مرتب کرنے کے حوالے سے آگاہ کیا گیا۔ اس کے علاوہ ملیریا کی علامات، بچاؤ، بروقت تشخیص، علاج اور مریضوں کی مسلسل نگرانی کے عملی طریقوں پر بھی روشنی ڈالی گئی۔

تربیت کے دوران صحت مراکز میں بیماری سے متعلق معلومات کی درست رپورٹنگ، کیسز کی نگرانی اور متعلقہ اداروں کے درمیان رابطہ کاری بہتر بنانے کی اہمیت بھی اجاگر کی گئی۔

ڈسٹرکٹ ہیلتھ آفیسر ڈاکٹر محمد فہیم خان نے کہا کہ ملیریا سمیت دیگر متعدی بیماریوں کی روک تھام اور مؤثر کنٹرول کے لیے طبی عملے کی پیشہ ورانہ صلاحیتوں میں اضافہ، بروقت تشخیص اور معیاری علاج بنیادی اہمیت رکھتے ہیں۔ انہوں نے ہدایت کی کہ تربیت کے دوران حاصل کردہ معلومات اور رہنما اصولوں پر تمام صحت مراکز میں مؤثر عمل درآمد یقینی بنایا جائے۔

تین روزہ تربیتی پروگرام کا مقصد طبی عملے کی تکنیکی مہارتوں کو بہتر بنانا، ملیریا کے علاج و معالجے اور کیس مینجمنٹ کے نظام کو مؤثر بنانا اور بیماری کی نگرانی و رپورٹنگ کے عمل کو مضبوط کرنا ہے، تاکہ ضلع لورالائی میں مریضوں کو بروقت تشخیص اور مناسب علاج کی سہولیات فراہم کی جا سکیں۔

Web Desk

Comments are closed.