کوئٹہ، 8 اگست: وزیراعلیٰ بلوچستان میر سرفراز بگٹی نے ہنگو میں سیکیورٹی فورسز کے کامیاب انٹیلی جنس بنیاد پر آپریشن میں فتنۃ الخوارج کے 7 کارندوں کی ہلاکت پر سیکیورٹی فورسز کو خراجِ تحسین پیش کیا ہے۔
اپنے بیان میں وزیراعلیٰ نے آپریشن کے دوران بہادری سے لڑتے ہوئے شہید ہونے والے کیپٹن حمزہ اکرم کو بھی خراجِ عقیدت پیش کیا۔ انہوں نے کہا کہ وطن کے دفاع اور امن و استحکام کے لیے اپنی جانوں کا نذرانہ پیش کرنے والے ہمارے اصل ہیرو ہیں۔
میر سرفراز بگٹی نے کہا کہ دہشت گردی کے خلاف جنگ میں پاک فوج اور دیگر سیکیورٹی اداروں کی قربانیاں پوری قوم کے لیے باعثِ فخر ہیں۔ شہداء کی قربانیاں رائیگاں نہیں جائیں گی اور ان کی بدولت ملک میں پائیدار امن و استحکام کی منزل حاصل ہوگی۔
انہوں نے کہا کہ دہشت گرد عناصر اور ان کے سہولت کاروں کے لیے پاکستان میں کوئی جائے پناہ نہیں، ریاست کی رٹ کو چیلنج کرنے والوں کے خلاف بلاامتیاز کارروائی جاری رہے گی۔
وزیراعلیٰ نے کہا کہ پوری قوم دہشت گردی کے خلاف جنگ میں اپنی بہادر افواج اور سیکیورٹی فورسز کے ساتھ کھڑی ہے۔ بلوچستان کے عوام بھی امن کے قیام اور دہشت گردی کے خاتمے کے لیے ریاستی اداروں کی جدوجہد میں شانہ بشانہ ہیں۔
Comments are closed.