بلوچستان میں پولیو کے خاتمے کے لیے ہنگامی بنیادوں پر اقدامات—چیف سیکرٹری بلوچستان

پولیو وائرس کی نگرانی، ویکسینیشن مہمات اور خواتین پولیو ورکرز کے کردار پر زور؛ حکومت بلوچستان کا مکمل عزم

~عسکر رپورٹ

کوئٹہ – چیف سیکرٹری بلوچستان شکیل قادر خان کی زیر صدارت پولیو کے خاتمے کے حوالے سے ایک اہم اجلاس منعقد ہوا جس میں گزشتہ پولیو مہم کے نتائج اور آئندہ مہم کی تیاریوں کا تفصیلی جائزہ لیا گیا۔

اجلاس سے خطاب کرتے ہوئے چیف سیکرٹری نے کہا کہ پولیو کا مکمل خاتمہ صوبائی حکومت کی اولین ترجیحات میں شامل ہے، اور اس مقصد کے لیے تمام دستیاب وسائل بروئے کار لائے جا رہے ہیں۔ انہوں نے کہا کہ پاکستان دنیا کے ان چند ممالک میں شامل ہے جہاں اب بھی پولیو وائرس موجود ہے، جس کا خاتمہ ایک قومی ذمہ داری ہے۔

اجلاس میں ایمرجنسی آپریشن سینٹر (EOC) کے صوبائی کوآرڈینیٹر انعام الحق نے بریفنگ دیتے ہوئے بتایا کہ سیوریج کے نمونوں کے ذریعے ماحولیاتی نگرانی کا نظام فعال ہے، اور متعدد اضلاع میں پولیو وائرس کی موجودگی کی رپورٹس منفی آئی ہیں، جو ایک مثبت اشارہ ہے۔

انہوں نے بتایا کہ صوبہ بھر میں پانچ سال سے کم عمر بچوں کو پولیو کے قطرے پلانے کے لیے تسلسل سے ویکسینیشن مہمات چلائی جاتی ہیں۔ ان مہمات کے دوران دور دراز اور دشوار گزار علاقوں تک رسائی کے لیے بھی خصوصی انتظامات کیے جاتے ہیں۔

چیف سیکرٹری نے زور دیا کہ پولیو کے خاتمے میں قبائلی عمائدین، علمائے کرام اور سول سوسائٹی کا کلیدی کردار ہے، جو عوام میں ویکسین کی اہمیت اجاگر کر سکتے ہیں۔ انہوں نے مزید کہا کہ ویکسینیشن ٹیموں کی حفاظت اور آسان رسائی کو یقینی بنانے کے لیے مؤثر اقدامات کیے جا رہے ہیں۔

انہوں نے کہا کہ خواتین پولیو ورکرز مہم کا لازمی حصہ ہیں، جو گھر گھر جا کر بچوں کو قطرے پلاتی ہیں۔ کئی علاقوں میں ثقافتی رکاوٹوں کی وجہ سے مرد ورکرز گھروں میں داخل نہیں ہو سکتے، اس لیے خواتین ورکرز ہی بچوں تک پہنچنے کا واحد ذریعہ ہیں۔ ان کی حفاظت، حوصلہ افزائی، اور محفوظ کام کا ماحول فراہم کرنا حکومت کی ذمہ داری ہے اور پولیو کے خاتمے کی مہم کی کامیابی کے لیے ناگزیر ہے۔چیف سیکرٹری نے آخر میں عزم ظاہر کیا کہ صوبائی حکومت سنجیدگی اور بھرپور عزم کے ساتھ پولیو کے مکمل خاتمے کے لیے سرگرم عمل ہے، اور تمام متعلقہ اداروں کو ہدایت کی گئی ہے کہ اس قومی فریضے کو کامیاب بنانے میں کوئی کسر نہ چھوڑی جائے۔