میر ظہور احمد بلیڈی کی قبائلی نظام سے متعلق بیان کی وضاحت، آئینی اصلاحات کی حمایت کا اعادہ
عسکر انٹرنیشنل رپورٹ
کوئٹہ: صوبائی وزیر برائے منصوبہ بندی و ترقی میر ظہور احمد بلیڈی نے بلوچستان اسمبلی میں قبائلی نظام سے متعلق اپنے بیان کی وضاحت کرتے ہوئے کہا ہے کہ ان کا مقصد قبائلی روایات، قبائلی عمائدین یا کسی مخصوص شخصیت کی توہین کرنا نہیں تھا۔
انہوں نے کہا کہ ان کی گفتگو کا مقصد قبائلی اور سرداری نظام کے بعض پہلوؤں میں موجود استحصالی رویوں، ناانصافیوں اور سماجی مسائل کی نشاندہی کرنا تھا۔
صوبائی وزیر نے کہا کہ عوامی محرومیوں اور تاریخی و سیاسی شخصیات سے متعلق ان کے بیان کی بعض ذرائع ابلاغ میں کی جانے والی تشریحات ان کے اصل مؤقف کی درست عکاسی نہیں کرتیں۔
انہوں نے واضح کیا کہ انہوں نے نہ تو بغاوت کی حمایت کی اور نہ ہی عوامی شکایات کی بنیاد پر تشدد یا کسی غیر آئینی اقدام کو جائز قرار دیا۔
میر ظہور احمد بلیڈی نے کہا کہ ایسے فرسودہ اور استحصالی رویوں کی نشاندہی ضروری ہے جو تعصب، قبائلی انتہا پسندی، نفرت، تشدد اور معاشرتی تقسیم کو فروغ دیتے ہیں۔
انہوں نے زور دیا کہ ان کا مؤقف آئین پاکستان کی بالادستی، قومی یکجہتی، تمام شہریوں کے مساوی حقوق اور پُرامن جمہوری اصلاحات پر مبنی ہے۔
ان کا کہنا تھا کہ قبائلی روایات کے مثبت پہلوؤں کا احترام برقرار رہنا چاہیے، جبکہ فرسودہ اور استحصالی طریقوں کی اصلاح آئینی، قانونی اور تدریجی اقدامات کے ذریعے کی جانی چاہیے۔
انہوں نے کہا کہ بلوچستان کو جدید جمہوری اقدار، سماجی انصاف اور ترقی کے تقاضوں کے مطابق اصلاحات کی جانب آگے بڑھنا ہوگا۔


Comments are closed.