جی ایس پی پلس تجارتی سہولت برقرار رکھنے کے لیے بروقت اقدامات اور رابطہ کاری کی ہدایت

1

عسکر انٹرنیشنل رپورٹ

اسلام آباد، 21 نومبر: نائب وزیراعظم و وزیر خارجہ سینیٹر محمد اسحاق ڈار نے یورپ کے ساتھ پاکستان کی برآمدات اور تجارت کے فروغ میں جی ایس پی پلس تجارتی سہولت کی اہمیت پر زور دیتے ہوئے متعلقہ حکام کو آئندہ جائزے سے قبل تمام تقاضوں کی بروقت تکمیل اور مؤثر بین الوزارتی رابطہ کاری یقینی بنانے کی ہدایت کی ہے۔

وہ ہفتے کو یورپی یونین کے ساتھ پاکستان کی جی ایس پی پلس حیثیت کا جائزہ لینے کے لیے منعقدہ بین الوزارتی اجلاس کی صدارت کر رہے تھے۔

اجلاس میں جی ایس پی پلس نظام کے تحت بین الاقوامی کنونشنز پر عمل درآمد اور متعلقہ ضابطہ جاتی تقاضوں کی تکمیل میں پیش رفت کا جائزہ لیا گیا۔ شرکاء نے ادارہ جاتی سطح پر آئندہ اقدامات اور جائزے کے سلسلے میں پاکستان کی سفارتی رابطہ کاری کی حکمتِ عملی پر بھی غور کیا۔

اسحاق ڈار نے متعلقہ وزارتوں اور محکموں کو ہدایت کی کہ وہ قریبی رابطہ کاری برقرار رکھیں اور تمام ضروری تقاضوں کو مقررہ وقت کے اندر پورا کرنے کے لیے اقدامات کریں۔

اجلاس میں سیکریٹریز خارجہ امور، تجارت اور اطلاعات و نشریات، یورپی یونین و بیلجیئم میں پاکستان کے سفیر اور متعلقہ وفاقی و صوبائی وزارتوں اور محکموں کے اعلیٰ حکام نے شرکت کی۔

جی ایس پی پلس کے تحت یورپی منڈیوں تک ترجیحی رسائی پاکستان کی برآمدات اور یورپی یونین کے ساتھ تجارتی تعلقات میں اہم کردار ادا کرتی ہے۔

Web Desk

Comments are closed.